ഭുവനേശ്വർ: പുരി ജഗന്നാഥ ക്ഷേത്രത്തിൽ ഭക്തർക്ക് ഡ്രസ് കോഡ് ഏർപ്പെടുത്തുമെന്ന് ക്ഷേത്രഭരണ സമിതി. ജനുവരി ഒന്ന് മുതലാണ് ഡ്രസ് കോഡ് ഏർപ്പെടുത്തുന്നത്. ക്ഷേത്രത്തിലെ നിതി ഉപസമിതി യോഗത്തിലാണ് തീരുമാനമായത്. ക്ഷേത്രപാരമ്പര്യത്തിന് നിരക്കാത്ത തരത്തിൽ മോശം വസ്ത്രം ധരിച്ച് ചിലരെ ക്ഷേത്ര പരിസരത്ത് കണ്ടതിനെ തുടർന്നാണ് നടപടി.
ഭക്തജനങ്ങൾക്കിടയിൽ വസ്ത്രധാരണത്തെക്കുറിച്ച് ബോധവത്ക്കരണം നടത്തുമെന്ന് ക്ഷേത്രഭരണസമിതി അറിയിച്ചു. ക്ഷേത്രത്തിന്റെ അന്തസ്സും പവിത്രതയും കാത്ത് സൂക്ഷിക്കേണ്ടത് ഭക്തരുടെ ഉത്തരവാദിത്തമാണെന്നും എന്നാൽ ചിലർ മറ്റുള്ളവരുടെ മതവികാരം മാനിക്കാതെ ക്ഷേത്രദർശനം നടത്തുന്നതായി ശ്രദ്ധയിൽപ്പെട്ടെന്നും ജഗന്നാഥ ക്ഷേത്ര ഭരണസമിതി അറിയിച്ചു.
ബീച്ചിലും പാർക്കിലും ധരിക്കുന്ന വസ്ത്രങ്ങൾ ധരിച്ചാണ് ചിലർ ക്ഷേത്രത്തിലെത്തുന്നത്. ക്ഷേത്രം ദൈവത്തിന്റെ വാസസ്ഥലമാണ് വിനോദസഞ്ചാര കേന്ദ്രമല്ല. ഏത് തരത്തിലുള്ള വസ്ത്രങ്ങളാണ് അനുവദിക്കേണ്ടതെന്ന് ഉടൻ തീരുമാനിക്കുമെന്ന് ക്ഷേത്ര ഭരണസമിതി മേധാവി രഞ്ജൻ കുമാർ പറഞ്ഞു. .
ജനുവരി ഒന്ന് മുതൽ ക്ഷേത്രത്തിനുള്ളിൽ ഡ്രസ് കോഡ് കർശനമായി നടപ്പിലാക്കും. ഷോർട്ട്സ്, ജീൻസ്, പാവാട, സ്ലീവ്ലെസ് വസ്ത്രങ്ങൾ എന്നിവ ധരിച്ച ആളുകളെ ക്ഷേത്രത്തിൽ പ്രവേശിപ്പിക്കില്ലെന്ന് ഭരണസമിതി വ്യക്തമാക്കി.
