ന്യൂഡൽഹി: ഭാരതത്തിന് സ്വർണ മെഡൽ സമ്മാനിച്ച് ഇന്ത്യൻ സൈന്യം. യുകെയിലെ വെയിൽസിൽ നടന്ന 2023 അന്താരാഷ്ട്ര സൈനികാഭ്യാസത്തിൽ കാംബ്രിയൻ പട്രോൾ മത്സരത്തിലാണ് ഇന്ത്യൻ ആർമി സ്വർണം കരസ്ഥമാക്കിയത്. ഇന്ത്യൻ ആർമിയെ പ്രതിനിധീകരിച്ച് 3/5 ഗൂർഖ റൈഫിളിലെ സൈനിക ഉദ്യോഗസ്ഥരാണ് സൈനിക അഭ്യാസത്തിൽ ഭാരതത്തിനായി സ്വർണ മെഡൽ സ്വന്തമാക്കിയത്.
വിവിധ രാജ്യങ്ങളിൽ നിന്നായി 111 ടീമുകളും ലോകമെമ്പാടുമുള്ള പ്രത്യേക സുരക്ഷാ സേനയേയും , റെജിമെന്റ് ഫോഴ്സിനെയും പ്രതിനിധീകരിക്കുന്ന 38 അന്താരാഷ്ട്ര ടീമുകളും കാംബ്രിയൻ പട്രോളിൽ പങ്കെടുക്കാൻ എത്തിയിരുന്നു. ഇതിൽ 111 ടീമുകൾക്കെതിരെ പോരാടിയാണ് ഇന്ത്യൻ സൈന്യം വിജയം കൈവരിച്ചത്.
‘സൈനിക പട്രോൾ ഒളിമ്പിക്സ് ‘ എന്നും യുകെ ആർമി സംഘടിപ്പിച്ച കാംബ്രിയൻ പട്രോൾ അഭ്യാസം ലോകമെമ്പാടുമുള്ള സൈനികർക്കിടയിൽ അറിയപ്പെടുന്നു. സംഘമനോഭാവം വളർത്തുക, സഹിഷ്ണുത വർദ്ധിപ്പിക്കുക തുടങ്ങിയവയാണ് മത്സരത്തിന്റെ പ്രധാന ലക്ഷ്യം. 48 മണിക്കൂറോളം യുകെയിലെ പർവ്വതനിരകളിൽ ദൗത്യങ്ങൾ വിജയകരമായി പൂർത്തീകരിച്ചാണ് ഇന്ത്യൻ സൈന്യം ഭാരതത്തിനായി വിജയം അർപ്പിച്ചത്.