ചായ പ്രേമികളെ.. നിങ്ങൾ അറിയാതെ തന്നെ നിങ്ങൾ അടിമകളാകുന്നു! മദ്യം മാത്രമല്ല, ചായയും ആസക്തിയുണ്ടാക്കും; ഈ ലക്ഷണങ്ങളുണ്ടോ?

വെള്ളം കഴിഞ്ഞാൽ പിന്നെ ലോകത്തേറ്റവും കൂടുതൽ ആളുകൾ കുടിക്കുന്ന പാനീയമാകും ചായ. ഒരു ചായ കുടിച്ചാൽ കിട്ടുന്ന ഉന്മേഷം അതൊന്ന് വേറെ തന്നെയാണ്. ഒരു കപ്പ് ചൂടുള്ള ചായ കുടിച്ച് ദിവസം തുടങ്ങുന്നവരാണ് ഭൂരിഭാഗം ആളുകളും. വൈകുന്നേരത്തെ ചായയോട് നോ പറയാൻ മടിയുള്ളവരുമുണ്ട് . അത്രയേറെ പ്രിയങ്കരമാണ് ചായ പലർക്കും.

എന്നാൽ പ്രതിദിനം നാലും അഞ്ചും പ്രാവശ്യം ചായ കുടിക്കുന്നവരും കുറവല്ല. ഇത്തരക്കാർ അറിയാതെ തന്നെ ചായക്ക് അടിമ പെടുകയാണ്. മദ്യം ആസക്തി ഉണ്ടാക്കുന്നത് പോലെ ചായയും ആസക്തിയുണ്ടാക്കുന്നു. കേൾക്കുമ്പോൾ തമാശ ആയി തോന്നുമെങ്കിലും സംഭവം സത്യമാണ്. ചായയിൽ അടങ്ങിയിരിക്കുന്ന കഫീനാണ് ഈ ആസക്തി ഉണ്ടാക്കുന്നതിനുള്ള കാരണം. ഉണർവും ഊർജ്ജവും നൽകാൻ കഫീൻ സഹായിക്കുമെങ്കിലും അമിതമായാൽ പണി കിട്ടുമെന്ന് ചുരുക്കം.

കഫീൻ അമിതമായാൽ മെറ്റബൊളിസത്തെ ബാധിക്കും. ഉയർന്ന അളവിൽ ഉപയോഗിച്ചാൽ ഉത്കണ്ഠയ്‌ക്കും അസ്വസ്ഥതയ്‌ക്കും കാരണമാകുന്നു. ഉറക്ക കുറവിനും ഇത് വഴിവെക്കും. ഒരു ദിവസം രണ്ട് കപ്പ് ചായയോ കാപ്പിയോ കഴിച്ചാൽ ശരീരത്തിന് ആവശ്യമായ കഫീൻ ലഭിക്കും. ഭക്ഷണത്തിന് ശേഷം ഇവ കുടിക്കരുതെന്നും വിദഗ്ധർ പറയുന്നു. ആഹാരം കഴിച്ച് കഴിഞ്ഞ് ഒരു മണിക്കൂറെങ്കിലും കഴിഞ്ഞ് മാത്രമേ കഫീൻ കഴിക്കാവൂ.

എന്തുകൊണ്ട് ചായയ്‌ക്ക് അടിമപ്പെടുന്നു ? 

ചായയിൽ അടങ്ങിയിരിക്കുന്ന കഫീൻ ശരീരം എളുപ്പത്തിൽ ആഗിരണം ചെയ്യുന്നു. തലച്ചോറിനെ നേരിട്ട് ഈ കഫീൻ ബാധിക്കുന്നു. ഇതിന്റെ ഫലമായി തലച്ചോറിലെ റിസപ്റ്ററുകളെ തടയുന്നു. ഈ സമയം അമിതമായി ഡോപമൈനും എൻഡോർഫിനും ഉത്പാദിപ്പിക്കപ്പെടുന്നു. ഊർജ്ജവും ഉന്മേഷവും അല്ലെങ്കിൽ സന്തോഷമുള്ള കാര്യങ്ങൾ ചെയ്യുമ്പോഴാണ് ഈ ഹാപ്പി ഹോർമോണുകൾ ഉത്പാദിപ്പിക്കപ്പെടുന്നത്. ചായ കുടിക്കുമ്പോൾ തലച്ചോറിൽ ഹാപ്പി ഹോർമോണുകൾ അധികമായി ഉത്പാദിപ്പിക്കപ്പെടുന്നു. അതുവഴി ചായ ആസക്തിയിലേക്ക് നയിക്കുന്നു.

ചായയ്‌ക്ക് അടിമപ്പെട്ടോ? 

ഓരോ മണിക്കൂറിലും ചായ കുടിക്കാൻ തോന്നുക, ചായ ഇല്ലാതെ കുറച്ച് മണിക്കൂർ ജോലി ചെയ്യുന്നത് സങ്കൽപ്പിക്കാൻ പോലും കഴിയാത്ത അവസ്ഥ, ചായ കിട്ടിയില്ലെങ്കിൽ ഞെടിയിടയിൽ ആക്രമാസക്തരാകുക, അസ്വസ്ഥത തുടങ്ങിയ ലക്ഷണങ്ങൾ പ്രകടിപ്പിക്കുന്നവർക്ക് ചായ ആസക്തിയുണ്ടാകാം.എന്നും ചായ കുടിക്കുന്ന സമയത്ത് ചായ കുടിച്ചില്ലെങ്കിൽ ചിലരിൽ ഉത്കണ്ഠയും വിഷാദവും തലവേദനയുമൊക്കെ വരാവുന്നതാണ്. ഇത്തരം ഗുരുതരമായ പ്രശ്‌നങ്ങൾ ഉള്ളവർ വൈദ്യസഹായം തേടേണ്ടതാണ്. പെട്ടെന്ന് തന്നെ ചായ കുടിക്കുന്ന ശീലം നിർത്തിയാൽ Withdrowal Sytmptoms പ്രകടിപ്പിച്ചേക്കാം. സമയമെടുത്ത് ഇതിൽ നിന്ന് കരകയറാവുന്നതാണ്.