ന്യൂഡൽഹി: നാഷണൽ കോഓപ്പറേറ്റീവ് ഫോർ എക്സ്പോർട്ട്സ് ലിമിറ്റഡ് (എൻസിഇഎൽ) സംഘടിപ്പിക്കുന്ന സഹകരണ കയറ്റുമതിയെക്കുറിച്ചുള്ള ദേശീയ സിമ്പോസിയത്തിൽ കേന്ദ്ര ആഭ്യന്തരമന്ത്രിയും സഹകരണ മന്ത്രിയുമായ അമിത് ഷാ പങ്കെടുക്കും. തിങ്കളാഴ്ച സംഘടിപ്പിക്കുന്ന പരിപാടിയിൽ എൻസിഇഎല്ലിന്റെ ലോഗോ, വെബ്സൈറ്റ്, ബ്രോഷർ എന്നിവ അമിത് ഷാ പ്രകാശനം ചെയ്യും. ഇന്ത്യൻ കാർഷിക കയറ്റുമതിയുടെ സാധ്യതകൾ, മറ്റ് സഹകരണ സ്ഥാപനങ്ങൾക്കുള്ള അവസരങ്ങൾ എന്നിങ്ങനെ വിവിധ വിഷയങ്ങൾ സിമ്പോസിയത്തിൽ ചർച്ച ചെയ്യും.
എൻസിഇഎല്ലിന്റെ സഹകരണ അംഗങ്ങൾ, ദേശീയ സഹകരണ ഫെഡറേഷനുകൾ ഉൾപ്പെടെ വിവിധ സഹകരണ മേഖലകളിലെ പ്രതിനിധികൾ, വിവിധ രാജ്യങ്ങളിലെ എംബസി പ്രതിനിധികൾ, കേന്ദ്ര-സംസ്ഥാന സർക്കാർ ഉദ്യോഗസ്ഥർ എന്നിവരുൾപ്പെടെ 1000-ത്തിലധികം പേർ സിമ്പോസിയത്തിൽ പങ്കെടുക്കും. മൾട്ടി-സ്റ്റേറ്റ് കോ-ഓപ്പറേറ്റീവ് സൊസൈറ്റി ആക്ട് 2002 പ്രകാരം ഈ വർഷം ജനുവരി 25-ന് രജിസ്റ്റർ ചെയ്ത സഹകരണ സംരംഭമാണ് നാഷണൽ കോഓപ്പറേറ്റീവ് ഫോർ എക്സ്പോർട്ട്സ് ലിമിറ്റഡ്. സഹകരണമേഖല വഴിയുള്ള കയറ്റുമതി പ്രോത്സാഹിപ്പിക്കുകയാണ് സംരംഭം ലക്ഷ്യം വയ്ക്കുന്നത്.
വിവിധ സംസ്ഥാനങ്ങളിൽ നിന്നുള്ള സഹകരണ സ്ഥാപനങ്ങൾ ഒറ്റകുടയ്ക്ക് കീഴിൽ അണി നിരക്കുന്നതാണ് മേഖലയ്ക്ക് ഗുണകരം എന്ന അമിത് ഷായുടെ ആശയമാണ് എൻസിഎല്ലിന്റെ പിറവിക്ക് പിന്നിലെ പ്രരണാ ശക്തി. രാജ്യത്തെ സഹകരണ സംവിധാനം ശക്തിപ്പെടുത്താൻ 27 മാസത്തിനിടെ 57 സംരംഭങ്ങളാണ് എൻസിഇഎല്ലിന്റെ കീഴിൽ ആരംഭിച്ചത്. സഹകരണ സംഘങ്ങളിലൂടെ കയറ്റുമതി പ്രോത്സാഹിപ്പിക്കുക എന്ന ലക്ഷ്യം മുൻ നിർത്തിയുള്ള സഹകാർ സേ സമൃദ്ധി എന്ന കാഴ്പ്പാടിലേക്കുള്ള ഉറച്ച കാൽവയ്പാണ് എൻസിഇഎൽ. രാജ്യത്ത് കയറ്റുമതി താത്പര്യമുള്ള ഏത് സഹകരണ സംഘങ്ങൾക്കും 2000 കോടി മൂലധനമുള്ള എൻസിഇഎല്ലിൽ അംഗം ആകാം. രാജ്യത്തെ പ്രമുഖ സ്ഥാപനങ്ങളിൽ നിന്നുള്ള വലിയ പിന്തുണ എൻസിഇഎല്ലിനുണ്ട്.
