ഏഷ്യൻ പാരാ ഗെയിംസിൽ വനിതകളുടെ അമ്പെയ്ത്തിന്റെ വ്യക്തിഗത കോമ്പൗണ്ട് ഓപ്പൺ ഇനത്തിൽ സ്വർണ്ണ മെഡൽ നേടിയ ശീതൾ ദേവിയെ അഭിനന്ദിച്ച് മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്ര. സമൂഹമാദ്ധ്യമത്തിലൂടെയാണ് അദ്ദേഹം ആശംസകൾ അറിയിച്ചത്. ശീതൾ ദേവി ഏവർക്കും മാതൃകയാണെന്നും ജീവിതത്തിലെ ചെറിയ പ്രശ്നങ്ങളെക്കുറിച്ച് താൻ ഇനി പരാതിപ്പെടില്ലെന്നും അദ്ദേഹം പറഞ്ഞു.
തന്റെ ജീവിതത്തിലെ ചെറിയ പ്രശ്നങ്ങളെക്കുറിച്ച് താൻ ഒരിക്കലും പരാതിപ്പെടില്ല. ശീതൾ ദേവി എല്ലാവർക്കും അദ്ധ്യാപികയാണ്. ശീതളിന് മഹീന്ദ്രയുടെ ഏത് വണ്ടി വേണമെങ്കിലും സ്വന്തമാക്കാമെന്നും ശീതളിന്റെ സൗകര്യാർത്ഥം വണ്ടി ഡിസൈൻ ചെയ്തു നൽകുമെന്നും അദ്ദേഹം സമൂഹമാദ്ധ്യമത്തിൽ പങ്കുവെച്ച പോസ്റ്റിൽ പറയുന്നു.
ജീവിതത്തിൽ അസാധാരണമായ കഴിവും സ്ഥിരോത്സാഹവും പ്രകടിപ്പിക്കുന്ന വ്യക്തികളെ പിന്തുണയ്ക്കുന്നതിൽ ആനന്ദ് മഹീന്ദ്ര വലിയ ശ്രദ്ധ കൊടുക്കാറുണ്ട്. കൈകൾ ഇല്ലാത്ത ശീതള് ദേവി കാലുകളും വായും ഉപയോഗിച്ചാണ് അമ്പെയ്യുന്നത്. ഇത്തരത്തിൽ അമ്പെയ്യുന്ന ശീതൾ ദേവിയുടെ നേട്ടത്തിനെയും അദ്ദേഹം അഭിനന്ദിക്കുകയാണ്.