തിരുവനന്തപുരം: “ഹിന്ദി ഔർ മലയാളം മേം ട്രാൻസ്ജെൻറർ വിമർശ്” എന്ന വിഷയത്തിൽ തിരുവനന്തപുരം ഗവൺമെൻറ് സംസ്കൃത കോളേജിൽ ദേശീയ സെമിനാർ ആരംഭിച്ചു. മൂന്ന് ദിവസം നീണ്ടുനിൽക്കുന്ന സെമിനാർ അന്തർദേശീയ തലത്തിൽ അറിയപ്പെടുന്ന കവയത്രിയും ലേഖികയുമായ ഡോക്ടർ ലത അഗർവാൾ ഉദ്ഘാടനം ചെയ്തു.
മനുഷ്യജാതിയുടെ വൈവിധ്യങ്ങൾ വ്യക്തമാക്കിക്കൊണ്ട് സ്ത്രീ പുരുഷ കിന്നര സമുദായങ്ങളെ കുറിച്ചും അവരുടെ ജീവിതത്തെക്കുറിച്ചും ഉദ്ഘാടക സംസാരിച്ചു. യക്ഷഗന്ധർവ്വകിന്നര ന്മാരെയൊക്കെ ദേവതകളുടെ പ്രതിനിധികളായി അഥവാ ഉപദൈവങ്ങളായാണ് നാം കണ്ടിരുന്നത്. സമൂഹത്തിൽ മാറ്റി നിർത്തേണ്ടവരായി ആരുമില്ല, എന്നാൽ അവരെ സമൂഹം എങ്ങനെ മനസ്സിലാക്കുന്നു എന്നതിലാണ് പ്രസക്തി എന്നും അവർ കൂട്ടിച്ചേർത്തു.
15 രാജ്യങ്ങളിൽ നിന്ന് വിശിഷ്ട അവാർഡുകൾ നേടിയ ശ്രീമതി ലത അഗർവൾ ഇപ്പോൾ ട്രാൻസ്ജെൻഡർ വിഷയത്തിൽ പഠന ഗവേഷണങ്ങൾ നടത്തിക്കൊണ്ടിരിക്കുന്നു.
കോളേജ് പ്രിൻസിപ്പൽ ഡോക്ടർ അമല വി കെ അധ്യക്ഷയായിരുന്നു. വിഖ്യാത ട്രാൻസ്ജെൻഡർ കവയത്രിയും കേരള സാഹിത്യ അക്കാദമി അംഗവുമായ ഡോക്ടർ (HC)വിജയരാജമല്ലിക അതിഥിയായിരുന്നു. മലയിൻകീഴ് ഗവൺമെൻറ് കോളേജ് പ്രിൻസിപ്പൽ ആയ പ്രൊഫ: (ഡോക്ടർ)സുമ ജി എസ് നെടുമങ്ങാട് ഗവൺമെൻറ് കോളേജ് പ്രിൻസിപ്പൽ ആയ പ്രൊഫ: (ഡോക്ടർ) ഷീലാകുമാരി എൽ എന്നിവരെ ആദരിച്ചു. പ്രൊഫ: (ഡോക്ടർ) എൽ ആർ ജയശ്രീ, ഡോക്ടർഹരിനാരായണൻ, കുമാരി സായൂജ്യ എന്നിവർ ആശംസകൾ അർപ്പിച്ചു. സെമിനാർ കോഡിനേറ്ററും ഹിന്ദി വിഭാഗം മേധാവിയുമായ ഡോക്ടർ ഷെർലിൻ സ്വാഗതവും ന്യായവിഭാഗം അധ്യാപികയായ ഡോക്ടർ. ലക്ഷ്മി വിജയൻ വിടി നന്ദിയും പറഞ്ഞു.
മൂന്നുദിവസം നീണ്ടുനിൽക്കുന്ന ദേശീയ സെമിനാർ നവംബർ ഒന്നിനാണ് അവസാനിക്കുന്നത്.
