സുരേഷ് ഗോപി പോലീസ് വേഷത്തിലെത്തുന്ന ചിത്രത്തിന് പോസിറ്റീവായ മൗത്ത് പബ്ലിസിറ്റി കൂടി ലഭിച്ചതോടെ ഗരുഡന് വൻ സ്വീകാര്യതയാണ് ലഭിച്ചിരിക്കുന്നത്. ചിത്രത്തിന്റെ ഓപ്പണിംഗ് ഡേ കളക്ഷന് ആണ് ഇപ്പോള് ശ്രദ്ധ നേടുന്നത്. ഒരു കോടിക്ക് മുകളിലാണ് ചിത്രത്തിന് ലഭിച്ച കളക്ഷന് എന്നാണ് ബോക്സ് ഓഫീസ് ട്രാക്കര്മാരായ ഫൈഡേ മാറ്റിനി അറിയിച്ചിരിക്കുന്നത്.
ഇതോടെ ശനി, ഞായർ ദിവസങ്ങളിൽ ചിത്രത്തിന് കാര്യമായ മുന്നേറ്റം ലഭിക്കുമെന്നാണ് സൂചന. ഗരുഡന്റെ ആദ്യ വാരാന്ത്യ കളക്ഷന് എത്രയാവും എന്ന് അറിയാനുള്ള കൗതുകത്തിലാണ് ഇപ്പോൾ ട്രാക്കർമാർ. 1 കോടി – 1.1 കോടി റേഞ്ചില് കേരളത്തില് നിന്ന് ചിത്രത്തിന് ആദ്യദിന കളക്ഷന് വന്നതായാണ് പ്രമുഖ ബോക്സ് ഓഫീസ് ട്രാക്കര്മാരുടെ വിശദീകരണം. റിലീസ് ദിന കേരള കളക്ഷനിലെ 75 ശതമാനവും വന്നിരിക്കുന്നത് ഈവനിംഗ്, നൈറ്റ് ഷോകളില് നിന്നാണ്.
ലീഗല് ത്രില്ലര് വിഭാഗത്തില് പെടുന്ന ചിത്രമാണിത്. ജിനേഷ് എം രചിച്ച കഥയ്ക്ക് മിഥുന് മാനുവല് തോമസ് ആണ് തിരക്കഥ എഴുതിയിരിക്കുന്നത്. മാജിക് ഫ്രെയിംസിന്റെ ബാനറില് ലിസ്റ്റിന് സ്റ്റീഫന് ആണ് നിര്മ്മാണം. ദിവ്യ പിള്ള, മാളവിക, ജഗദീഷ്, സിദ്ധിഖ്, നിഷാന്ത് സാഗര്, തലൈവാസല് വിജയ്, ദിലീഷ് പോത്തന്, മേജര് രവി, ബാലാജി ശര്മ, സന്തോഷ് കീഴാറ്റൂര്, രഞ്ജിത്ത് കാങ്കോല്, ജെയ്സ് ജോസ്, ജോസുകുട്ടി, ചൈതന്യ പ്രകാശ് തുടങ്ങി വലിയ താരനിരയും ചിത്രത്തില് അണിനിരന്നിരുന്നു.