ശ്വാസംമുട്ടിക്കുന്ന വായു മലിനീകരണത്തിലൂടെയാണ് നാം ദിനംപ്രതി കടന്നുപോകുന്നത്. ഡൽഹിയിലെ ജീവിതങ്ങൾ വീർപ്പുമുട്ടുന്നതിന്റെ നേർ കാഴ്‌ച്ചകൾ വാർത്തകളിലൂടെയും സമൂഹ മാദ്ധ്യമങ്ങളിലൂടെയും ഏവരും കണ്ടു. എന്നാൽ ഇതിന്റെ ദൂഷ്യഫലങ്ങൾ എന്ത്? ചിന്തിക്കേണ്ടിയിരിക്കുന്നു.
വായു മലിനീകരണം ബാധിച്ച പ്രദേശങ്ങളിൽ ജീവിക്കുന്ന 56 ശതമാനം ആളുകളിലും പാർക്കിസൺസ് രോഗം പിടിപെടാൻ സാധ്യതയുണ്ടെന്നാണ് പഠനങ്ങളിൽ പറയുന്നത്. അമേരിക്കൻ അക്കാദമി ഓഫ് ന്യൂറോളജിയുടെ പഠനങ്ങളിലാണ് ഇതു സംബന്ധിച്ച വിവരങ്ങൾ പുറത്തുവിട്ടിരിക്കുന്നത്. മസ്തിഷ്‌കത്തിന്റെ ചില പ്രത്യേക ഭാഗങ്ങളിലെ കോശങ്ങളിൽ ആൽഫാ സിന്യൂക്ലിൻ എന്ന് പേരുള്ള ഒരു തരം മാംസ്യം അടിഞ്ഞുകൂടി ഉണ്ടാക്കുന്ന ” ലൂയി വസ്തുക്കളെ” തുടർന്നാണ് പാർക്കിസൺസ് രോഗം ഉണ്ടാകുന്നത്.
ലൂയി വസ്തുക്കൾ അടിയുമ്പോൾ നാഡികൾക്ക് ക്ഷയം സംഭവിക്കുകയും അത് രോഗം മൂർച്ഛിക്കുന്നതിനും കാരണമാകുന്നു. ശരീര ഭാഗങ്ങൾക്ക് വിറയലുണ്ടാകുക, പേശികൾക്ക് ചലനശേഷി കുറഞ്ഞു വരിക തുടങ്ങിയവയാണ് ഈ രോഗത്തിന്റെ പ്രധാന ലക്ഷണങ്ങൾ. വായു മലിനീകരണം അമിതമായ സ്ഥലങ്ങളിൽ പാർക്കിസൺസ് രോഗങ്ങളും ക്യാൻസർ പോലുള്ള രോഗങ്ങളും ഉണ്ടാക്കാൻ സാധ്യതയുള്ള കണികകൾ ധാരാളം അന്തരീക്ഷത്തിൽ അടങ്ങിയിട്ടുള്ളതായി പഠനങ്ങളിൽ പറയുന്നു. ഈ വായു ശ്വസിക്കുന്നതു മൂലം മാരകമായ രോഗങ്ങൾ പിടിപെടാനുള്ള സാധ്യതയും വളരെ കൂടുതലാണെന്നാണ് വിദഗ്ധർ അഭിപ്രായപ്പെടുന്നത്.
