ശ്രീനഗർ: കശ്മീരിലെ കുപ്വാര ജില്ലയിൽ ഛത്രപതി ശിവാജിയുടെ പ്രതിമ സ്ഥാപിച്ചു. മഹാരാഷ്ട്ര മുഖ്യമന്ത്രി ഏകനാഥ് ഷിൻഡെ നേരിട്ടെത്തിയാണ് പ്രതിമ അനാച്ഛാദനം ചെയ്ത്. ജമ്മുകശ്മീർ ലെഫ്. ഗവർണർ മനോജ് സിൻഹ ചടങ്ങിൽ പങ്കെടുത്തു. നിയന്ത്രണ രേഖയ്ക്ക് അടുത്തായി 41 മറാത്ത റൈഫിൾസിലാണ് പ്രതിമ സ്ഥാപിച്ചിരിക്കുന്നത്.
പ്രതിമ നിർമ്മിക്കാനുള്ള വസ്തുക്കൾ ശിവജിയുടെ പ്രധാന കോട്ടകളായ ശിവ്നേരി, തോർന, രാജ്ഗഡ്, പ്രതാപ്ഗഡ്, റായ്ഗഡ് എന്നിവിടങ്ങളിൽ നിന്നാണ് എത്തിച്ചത്. 10.5 അടി ഉയരമുള്ള പ്രതിമ അംഹി പൊനേക്കർ ഫൗണ്ടേഷൻ, ഛത്രപതി ശിവാജി മഹാരാജ് സമർക്ക് സമിതി എന്നിവർ ചേർന്നാണ് നിർമ്മിച്ചത്. 2200 കിലോമീറ്ററുകൾ സഞ്ചരിച്ച് കഴിഞ്ഞ ആഴ്ചയാണ് പ്രതിമയെ കശ്മീരിൽ എത്തിച്ചത്.
ഛത്രപതിയുടെ കിരീടധാരണത്തിന്റെ 350-ാം വാർഷികം പ്രമാണിച്ചാണ് പ്രതിമ സ്ഥാപിച്ചത്. 2022ൽ ഇന്ത്യൻ സൈന്യത്തിന്റെ മറാത്ത റെജിമെന്റ് ക്യാമ്പിൽ ഛത്രപതി ശിവാജിയുടെ പ്രതിമ സ്ഥാപിച്ചിരുന്നു.