ജനങ്ങൾ, തന്നെ എപ്പോഴും ജനപ്രിയ നായകനെന്ന് വിളിച്ചാൽ മതിയെന്ന് നടൻ ദിലീപ്. ജനങ്ങൾ അവരിൽ ഒരാളായാണ് തന്നെ കാണുന്നതെന്നും ദിലീപ് പറഞ്ഞു. നടന്റെ പുതിയ സിനിമയായ ബാന്ദ്രയുടെ പ്രമോഷനുമായി ബന്ധപ്പെട്ട അഭിമുഖത്തിനിടയിലായിരുന്നു താരം ഇക്കാര്യം പറഞ്ഞത്. ജനപ്രിയ നടൻ എന്ന വിളിയിൽ നിന്നും സൂപ്പർ സ്റ്റാർ പദവിയിലേക്ക് എത്തണമെന്ന് ആഗ്രഹമില്ലെയോ? എന്ന അവതാരകയുടെ ചോദ്യത്തിനായിരുന്നു ദിലീപ് മറുപടി നൽകിയത്.
‘ജനങ്ങൾ എന്നെ ജനപ്രിയ നടനായി എപ്പോഴും വിളിച്ചാൽ മതി. എനിക്ക് അതാണ് ഇഷ്ടം. അവരിൽ ഒരാളായാണ് എന്നെ എപ്പോഴും കാണുന്നത്. ഏത് സമയത്തും എന്റെ കൂടെ നിന്നിട്ടുള്ളത് അവരാണ്. ജനങ്ങളിൽ നിന്നും മാറി നിൽക്കുന്ന ഒരു അവസ്ഥ ഞാൻ ചിന്തിക്കുന്നുമില്ല. അവർ തന്നെയാണ് എന്നെ ക്രിയേറ്റ് ചെയ്തത്. എന്നെ നിലനിർത്തുന്നതും ജനങ്ങളാണ്. അവരോടാണ് എന്റെ കമ്മിറ്റ്മെന്റ്സ്.
ആദ്യം നന്ദി പറയേണ്ടത് ദൈവത്തിന്. അത് കഴിഞ്ഞാൽ എന്റെ പ്രേക്ഷകർക്കാണ് നന്ദി അറിയിക്കേണ്ടത്. പിന്നെ എന്റെ സഹപ്രവർത്തകർക്കും. എന്നെ സ്ക്രീനിൽ കൊണ്ട് വരുന്ന ഓരോ സിനിമയുടേയും നിർമ്മാതാക്കൾ, സംവിധായകർ, എഴുത്തുകാർ,ക്യാമാറമാൻ തുടങ്ങി കൂടെയുള്ള എല്ലാവർക്കും.
സിനിമയാണ് എനിക്ക് ഏറ്റവും ഇഷ്ടം. കാരണം, സിനിമയാണ് എനിക്ക് എല്ലാം തന്നത്. അതാണ് ഞാൻ ആഗ്രഹിച്ചതും. സിനിമ എനിക്ക് ദൈവം തന്ന വലിയൊരു പുണ്യമാണ്, വലിയൊരു നിധി. സിനിമ മുന്നോട്ട് കൊണ്ട് പോകാൻ കഴിയുന്നത് പ്രേക്ഷകരുടെ കൈയ്യടി, സപ്പോർട്ട് എല്ലാം കൊണ്ടാണ്. അവരെ വിശ്വസിച്ചാണ് ഇത്രയും വലിയ സിനിമ വരെ ചെയ്യുന്നത്. ഇത് കാണാൻ എന്റെ പ്രിയപ്പെട്ടവർ വരും എന്നുള്ള ഉറപ്പ്.’ -ദിലീപ് പറഞ്ഞു.
