തൃശൂർ: ബിജെപിക്കെതിരെയും സുരേഷ് ഗോപിക്കെതിരെയും വ്യാജ വാർത്ത ചമച്ച ദേശാഭിമാനിക്കെതിരെ കേസ് നൽകുമെന്ന് തൃശൂർ ബിജെപി പ്രസിഡന്റ് കെ.കെ അനിൽ കുമാർ. സുരേഷ് ഗോപിക്കെതിരെ ബിജെപി നേതാക്കൾ രംഗത്തു വന്നു എന്ന തരത്തിലുള്ള വാർത്തയാണ് ദേശാഭിമാനി സൃഷ്ടിച്ചത്. ജനങ്ങളെ തെറ്റിദ്ധരിപ്പിക്കാൻ വേണ്ടി നടക്കാത്ത ബിജെപി ജില്ലാ യോഗത്തെപ്പറ്റി എഴുതുകയായിരുന്നു ഇടത് മാദ്ധ്യമം.
നവംബർ 7-ാം തീയതിയാണ് ദേശാഭിമാനി ലേഖകൻ വേണു കെ അലത്തൂരിന്റെ പേരിൽ വ്യാജ വാർത്ത പ്രത്യക്ഷപ്പെട്ടത്. തൃശൂർ ബിജെപി ജില്ലാ യോഗത്തിൽ സുരേഷ് ഗോപിക്കെതിരെ നേതാക്കളുടെ പരമാർശം ഉണ്ടായതായാണ് ലേഖകൻ എഴുതിയത്. നടക്കാത്ത ജില്ലാ യോഗത്തിന്റെ പേരിലാണ് ഇത്തരം വാർത്തകളെന്നും നുണക്കഥയാണ് ദേശാഭിമാനി പ്രസിദ്ധീകരിക്കുന്നതെന്നും ജില്ലാ പ്രസിഡന്റ് പറഞ്ഞു.
സുരേഷ് ഗോപിയ്‌ക്കെതിരെ കള്ളക്കേസും കള്ള പ്രചാരണങ്ങളും സൃഷ്ടിക്കാൻ ശ്രമിക്കുന്നതിന്റെ ഭാഗമാണിത്. സുരേഷ് ഗോപിക്കെതിരെ സിപിഎം നടത്തുന്ന വിഷലിപ്തമായ നുണപ്രചരണങ്ങളെ ബിജെപി ചെറുത്ത് തോൽപ്പിക്കുമെന്നും ദേശാഭിമാനിക്കെതിരെ നിയമനടപടി സ്വീകരിക്കുമെന്നും കെ.കെ അനീഷ് കുമാർ പറഞ്ഞു.
