ഉണ്ണി മുകുന്ദൻ നായകനാകുന്ന ജയ് ഗണേഷിന്റെ പൂജ തൃക്കാക്കര അമ്പലത്തിൽ വച്ച് നടന്നു. രഞ്‍ജിത് ശങ്കർ സംവിധാനം ചെയ്യുന്ന ചിത്രം വളരെ പ്രതീക്ഷയോടെയാണ് സിനിമാ പ്രേമികൾ ഉറ്റുനോക്കുന്നത്. രാവിലെ 10:30-ന് ക്ഷേത്രാങ്കണത്തിൽ വച്ച് നടന്ന പൂജയിൽ ഉണ്ണി മുകുന്ദനും രഞ്‍ജിത് ശങ്കറിനുമൊപ്പം നടിമാരായ മഹിമ നമ്പ്യാർ, ജോമോള്‍ എന്നിവരും സിനിമയുടെ മറ്റ് അണിയറ പ്രവർത്തകരും പങ്കെടുത്തു.
ഉണ്ണി മുകുന്ദൻ ഫിലിസും രഞ്‍ജിത്ത് ശങ്കറിന്റെ ഡ്രീംസ് എൻ ബിയോണ്ടും ചേര്‍ന്നാണ് ജയ് ഗണേഷ് നിർമ്മിക്കുന്നത്. ഉണ്ണി മുകുന്ദന്റെ അച്ഛൻ എം. മുകുനാണ് സിനിമയുടെ ഫസ്റ്റ് ക്ലാപ് അടിച്ചത്. സിനിമയുടെ ചിത്രീകരണം നവംബർ 11-ന് ആരംഭിക്കും. എറണാകുളത്തും പരിസര പ്രദേശങ്ങളിലുമായിട്ടായിരിക്കും ഷൂട്ടിംഗ്. ചന്ദു സെല്‍വരാജാണ് ഛായാഗ്രാഹണം നിര്‍വഹിക്കുക. തന്റെ കരിയറിലെ വ്യത്യസ്തമായ വേഷമായിരിക്കും ജയ് ഗണേഷിലേത് എന്ന് ഉണ്ണി മുകുന്ദൻ മാദ്ധ്യമങ്ങളോട് പ്രതികരിച്ചു.
“ജയ് ഗണേഷ് ഷൂട്ടിംഗ് അടുത്ത ദിവസം ആരംഭിക്കും. മികച്ച തിരക്കഥയാണ് ജയ് ഗണേഷിന്റേത്. നല്ലൊരു ഫാമിലി എന്റർടെയ്ൻമെന്റ് ആയിരിക്കും. കുടുംബ പ്രേക്ഷകരിലേക്ക് എത്തുന്ന തരത്തിലുള്ള സിനിമകളാണ് ഞാൻ തിരഞ്ഞെടുക്കാൻ ശ്രമിക്കാറുള്ളത്. ഒരു നടനെന്ന നിലയിലും വളരെ വെല്ലുവിളി നിറഞ്ഞ കഥാപാത്രമായിരിക്കും ജയ് ഗണേഷിലേത്. എന്റെ കരിയറിൽ ചെയ്തത് വച്ചിട്ടുള്ളതിൽ വച്ച് മാനസികമായും ശാരീരികമായും വ്യത്യസ്തമായ ഒന്നായിരിക്കും ഈ സിനിമയിലെ കഥാപാത്രം. മാളികപ്പുറത്തിന് ശേഷം ഏകദേശം ഒരു വർഷമായി ഒരു മലയാള സിനിമ ഷൂട്ടിൽ ഞാൻ പങ്കെടുത്തിട്ട്“- ഉണ്ണി മുകുന്ദൻ പറഞ്ഞു.
