പ്രേക്ഷകരുടെ പ്രിയപ്പെട്ട നായകൻമാരായ സുരേഷ് ഗോപിയും ബിജു മേനോനും വലിയൊരു ഇടവേളയ്ക്ക് ശേഷം ഒരുമിച്ച ചിത്രമായിരുന്നു ഗരുഡൻ. ഇതിനോടകം റിലീസ് ചെയ്ത എല്ലാ തിയറ്ററുകളിലും ചിത്രം മികച്ച അഭിപ്രായം നേടി മുന്നേറുകയാണ്. മിഥുൻ മാനുവൽ തോമസ് തിരക്കഥയൊരുക്കിയ മറ്റൊരു സസ്പെൻസ് ത്രില്ലർ ചിത്രമാണ് ഗരുഡൻ. നവാഗതനായ അരുൺ വർമ്മനാണ് ചിത്രത്തിന്റെ സംവിധായൻ.
ജോഷി സംവിധാനം ചെയ്ത ക്രിസ്ത്യൻ ബ്രദേഴ്സിലാണ് ഒടുവിൽ സുരേഷ് ഗോപിയും ബിജു മേനോനും ഒന്നിച്ചത്. എന്നാൽ ഇത് ആദ്യാമായിട്ടാകും സുരേഷ് ഗോപിയുടെ പ്രതിനായകനായി ബിജു മേനോൻ എത്തുന്നത്. ഗരുഡനിൽ ഇരുവരും വീണ്ടും ഒന്നിച്ചപ്പോഴുണ്ടായ സന്തോഷ നിമിഷങ്ങൾ പങ്കുവെക്കുകയാണ് താരം. ഒരു അഭിമുഖത്തിലാണ് അദ്ദേഹം ഇക്കാര്യങ്ങൾ തുറന്നു പറഞ്ഞത്.
ക്രിസ്ത്യൻ ബ്രദേഴ്സിനുശേഷം ഞങ്ങൾ വീണ്ടും ഒന്നിക്കുന്ന ചിത്രമാണ് ഗരുഡൻ. ഒന്നിച്ച് അധികം സിനിമകൾ ഒന്നും ചെയ്തിട്ടില്ലെങ്കിലും സ്ഥിരം കാണുന്നവരല്ലെങ്കിലും ഞങ്ങൾ തമ്മിലുള്ള സൗഹൃദത്തിന് ഒരിക്കലും കുറവൊന്നുമുണ്ടായിട്ടില്ല. ഗരുഡൻ എന്ന സിനിമയ്ക്ക് വേണ്ടി സുരേഷേട്ടൻ ഒരുപാട് വിട്ടുവീഴ്ചകൾ ചെയ്തിട്ടുണ്ട്. ഞാൻ അഭിനയിച്ചു കൊണ്ടിരുന്ന മറ്റു ചില ചിത്രങ്ങളുടെ ചിത്രീകരണം വൈകിയതിനാൽ ഗരുഡന്റെ ഷൂട്ടിംഗ് ആരംഭിക്കാൻ വൈകി. അപ്പോഴെല്ലാം സുരേഷേട്ടൻ എനിക്കായി കാത്തുനിന്നു, പലതവണ എന്റെ ഡേറ്റിൽ മാറ്റം വന്നപ്പോഴെല്ലാം അതൊന്നും കാര്യമാക്കാതെ അദ്ദേഹം ക്ഷമയോടെ പിന്നെയും കാത്തു നിന്നു.
നേരത്തെ അദ്ദേഹത്തിന്റെ ടീമിലൊരാളായി നിരവധി സിനിമകളിൽ ഞാൻ അഭിനയിച്ചിട്ടുണ്ട്. എന്നാൽ ആദ്യമായിട്ടായിരുന്നു അദ്ദേഹത്തിന് നേർക്കുനേർ വരുന്ന ഒരു പ്രതിനായക കഥാപാത്രം ചെയ്യുന്നത്. സുരേഷേട്ടനുമായുള്ള സൗഹൃദം തന്നെയാണ് ഗരുഡനിലെ രംഗങ്ങളെല്ലാം ഭംഗിയാക്കാൻ എന്നെ സഹായിച്ചത്.
