പാലക്കാട്: കൽപ്പാത്തിയിൽ ഇന്ന് രഥസംഗമം. ശീലക്ഷ്മി നാരായണ പെരുമാൾ ക്ഷേത്രത്തിൽ നിന്നും കൃഷ്ണ രഥം ഗ്രാമവീഥിയിൽ പ്രയാണം ആരംഭിക്കും. ചാത്തപ്പുരം പ്രസന്ന മഹാഗണപതി ക്ഷേത്രത്തിലെ രഥവും ഈ സമയം ഗ്രാമപ്രദക്ഷിണത്തിനിറങ്ങും. തുടർന്ന് വൈകുന്നേരം ആറിന് കൽപ്പാത്തിയിലെ നാല് ക്ഷേത്രങ്ങളിലെ ആറ് രഥങ്ങൾ ശ്രീ വിശാലാക്ഷിസമേത വിശ്വനാഥ ക്ഷേത്രത്തിന് മുന്നിൽ സംഗമിക്കും. സ്ത്രീകളാണ് പ്രധാനമായും തേര് വലിക്കുക.
ശിവ-പാർവതിയും ഗണപതിയും മുരുകനും കൃഷ്ണനും ഗ്രാമവീഥിയിൽ പരസ്പരം കാണുന്ന അപൂർവ നിമിഷമാണ് ഇന്ന്. രഥോത്സവത്തിന്റെ അവസാന ദിനമായ ഇന്നാണ് ഈ കാഴ്ചയ്‌ക്ക് സാക്ഷ്യം വഹിക്കാനാവുക.
കൽപ്പാത്തി വിശാലാക്ഷി സമേത വിശ്വനാഥ സ്വാമിയുടെ തിരു കല്യാണത്തോടെയാണ് ചടങ്ങുകൾക്ക് തുടക്കമായത്. അവസാനത്തെ മൂന്ന് ദിനം അലങ്കരിച്ച രഥം തെരുവികളിലൂടെ ക്ഷേത്രത്തിലേക്ക് വലിക്കുവാനായി ആയിരങ്ങളാണ് കൽപ്പാത്തിയുടെ മണ്ണിലെത്തി ചേരുന്നത്.
