എറണാകുളം: പുതിയ കണക്ക് പ്രകാരം രാജ്യത്ത് ഏറ്റവും കൂടുതൽ പാസ്പോർട്ട് ഉടമകൾ കേരളത്തിൽ. രാജ്യത്താകെ 10.87 കോടി പാസ്പോർട്ടുകളാണ് ആകെയുള്ളത്. അതിൽ 1.12 കോടി പേർ കേരളത്തിൽ നിന്നാണ്. ജനസംഖ്യയുമായി താരതമ്യം ചെയ്യുമ്പോൾ സംസ്ഥാനം ഏറെ മുന്നിലാണ്.
2022ലാണ് ഏറ്റവും കൂടുതൽ മലയാളികൾ പാസ്പോർട്ട് സ്വന്തമാക്കിയത്. കഴിഞ്ഞ വർഷം മാത്രം 15.07 ലക്ഷം പേർ പാസ്പോർട്ട് നേടി. ഈ വർഷം ഓഗസ്റ്റ് വരെയുള്ള കണക്ക് പരിശോധിച്ചാൽ കേരളത്തിൽ 1.12 കോടി പാസ്പോർട്ട് ഉടമകളാണുള്ളത്. 1.10 കോടി പാസ്പോർട്ടുമായി മഹാരാഷ്ട്രയാണ് തൊട്ട് പിന്നിൽ.
പാസ്പോർട്ട് ലഭ്യമാകുന്നതിലുള്ള നടപടിക്രമങ്ങൾ ലളിതമാവുകയും കിട്ടാനുള്ള കാലതാമസം കുറയുകയും ചെയ്തിട്ടുണ്ട്. 2014-ൽ പാസ്പോർട്ട് ലഭിക്കാൻ കുറഞ്ഞത് 21 ദിവസം വേണമായിരുന്നെങ്കിൽ 2023 ആയപ്പോഴേക്കും ഇത് ആറുദിവസമായി ചുരുങ്ങി. കേരളത്തിൽ നിന്ന് വിദേശരാജ്യങ്ങളിൽ പഠിക്കാൻ പോകുന്ന വിദ്യാർത്ഥികളുടെ എണ്ണവും ക്രമാതീതമായി കൂടിയിട്ടുണ്ട്. ഈ വർഷം ഇതുവരെ ഈ വിദേശ പഠനത്തിനായി 40,000 മലയാളികൾ പോയെന്നാണ് കണക്ക്.
