വിക്കി കൗശലിന്റെ പുതിയ ചിത്രത്തിന് വേണ്ടി മഹീന്ദ്ര സ്കോർപ്പിയോ ഉപയോഗിക്കുന്നതിന്റെ സന്തോഷം പങ്കുവെച്ച് ആനന്ദ് മഹീന്ദ്ര. വിക്കി കൗശലിന്റെ പുതിയ ചിത്രമായ ‘സാം മനേക് ഷാ’എന്ന ചിത്രത്തിലാണ് മഹീന്ദ്ര സ്കോർപ്പിയോയുടെ വരവ്. ട്വിറ്ററിലൂടെയാണ് വീഡിയോ പങ്കുവെച്ച് ആനന്ദ് മഹീന്ദ്ര സന്തോഷം പങ്കുവെച്ചത്.
ഇന്ത്യയുടെ ഏറ്റവും വലിയ സൈനികൻ മാർഷൽ സാം മനേക് ഷാ. തൊണ്ണൂറുകളുടെ അവസാനത്തിൽ അദ്ദേഹത്തെ ഒന്ന്, രണ്ട് തവണ കണ്ടുമുട്ടാനുള്ള ഭാഗ്യം തനിക്കുണ്ടായി. അന്ന് സൈന്യത്തിനായി അദ്ദേഹം മികച്ച എസ്യുവികൾ നിർമ്മിക്കേണ്ടതിനെ കുറിച്ച് എന്നോട് പറഞ്ഞിരുന്നു. ഇന്ന് അദ്ദേഹം ജീവനോട് ഉണ്ടായിരുന്നെങ്കിൽ സ്കോർപിയോ എൻ-ൽ അദ്ദേഹത്തോടൊപ്പം ഒരു യാത്രയ്ക്കായി ഞാൻ ആഗ്രഹിക്കുന്നു’ ആനന്ദ് മഹിന്ദ്ര ട്വിറ്ററിൽ കുറിച്ചു.
ഇന്ത്യയുടെ എട്ടാമത്തെ കരസേനാ മേധാവിയായിരുന്നു സാം മനേക് ഷാ. 1971-ലെ ഇന്ത്യ-പാകിസ്താൻ യുദ്ധത്തിൽ അദ്ദേഹമായിരുന്നു ഇന്ത്യയുടെ കരസേനാ മേധാവി. രണ്ടാം ലോക മഹായുദ്ധത്തിലാണ് അദ്ദേഹം സേനാരംഗത്തെ സേവനം ആരംഭിച്ചത്. തുടർന്ന് നാല് പതിറ്റാണ്ടുകളിൽ രാജ്യത്ത് നടന്ന അഞ്ച് യുദ്ധങ്ങളിൽ അദ്ദേഹം സുപ്രധാന പങ്കുവഹിച്ചിരുന്നു.