ലോകകപ്പ് യോഗ്യത റൗണ്ടിലെ രണ്ടാം മത്സരത്തില്‍ ഇന്ത്യ ഇന്ന് കരുത്തരായ ഖത്തറിനെതിരെ. ഭുവനേശ്വറില്‍ രാത്രി 7നാണ് മത്സരം. സ്‌പോര്‍ട്‌സ് 18 ചാനലുകളില്‍ തത്സമയം കാണാം.ജിയോസിനിമ വഴിയും സ്ട്രീമിംഗുണ്ട്. ഗ്രൂപ്പിലെ ആദ്യ മത്സരത്തില്‍ കുവൈറ്റിനെ അവരുടെ നാട്ടില്‍ തകര്‍ത്തതിന്റെ ആത്മവിശ്വാസത്തിലാണ് ടീം ഇന്ത്യ. കലിംഗ സ്റ്റേഡിയത്തില്‍ നടക്കുന്ന മത്സരത്തിനുള്ള ടിക്കറ്റുകള്‍ ഔദ്യോഗികമായി വിറ്റുതീര്‍ന്നു.
ഫിഫ റാങ്കില്‍ 61-ാം സ്ഥാനത്തുള്ള ഖത്തര്‍ അതിശക്തരായ ടീമാണ്. അഫ്ഗാനെ 8-1ന് തകര്‍ത്താണ് അവരുടെ വരവ്. 2019ല്‍ ലോകകപ്പ് യോഗ്യത റൗണ്ടില്‍ ഖത്തറിനെ നേരിട്ടപ്പോള്‍ ഇന്ത്യ മികച്ച പ്രകടനം നടത്തിയിരുന്നു. അവസാന രണ്ട് മത്സരങ്ങളിലും ഖത്തറിന് ഒപ്പം പിടിച്ചു നില്‍ക്കാന്‍ ഇന്ത്യക്ക് ആയിരുന്നു.
ലോകകപ്പ് യോഗ്യതയില്‍ ആദ്യവട്ടം ഏറ്റുമുട്ടിയപ്പോള്‍ ഒരു ഗോളിനാണ് ഇന്ത്യ തോല്‍വി വഴങ്ങിയത്. അബ്‌ഡെല്‍ അസീസാണ് 33-ാം മിനിട്ടില്‍ ഖത്തറിനായി വലകുലുക്കിയത്. ഗുര്‍പ്രീത് സിംഗ് സന്ദുവിന്റെ മിന്നും സേവുകളാണ് അന്ന് ഇന്ത്യക്ക് രക്ഷയായത്.രാഹുല്‍ ബെക്കേ ചുവപ്പ് കാര്‍ഡ് പുറത്തായപ്പോള്‍ ഇന്ത്യ പത്തുപേരുമായാണ് കളിച്ചത്.
