അണ്ടർ 19 ക്രിക്കറ്റ് ലോകകപ്പിന്റെ വേദി ശ്രീലങ്കയിൽ നിന്ന് മാറ്റി ഐസിസി. 2024 ജനുവരിയിൽ ആതിഥേയത്വം വഹിക്കേണ്ട ക്രിക്കറ്റ് ലോകകപ്പിന്റെ വേദിയാണ് ഐസിസി ദക്ഷിണാഫ്രിക്കയിലേക്ക് മാറ്റിയത്. ശ്രീലങ്കൻ ക്രിക്കറ്റിലെ അനിശ്ചിതാവസ്ഥയാണ് വേദി മാറ്റിയതിന് പിന്നിലെ കാരണം. ശ്രീലങ്കൻ ക്രിക്കറ്റ് ബോർഡിൽ സർക്കാരിന്റെ ഇടപെടൽ ഉണ്ടായതിനെ തുടർന്ന് ബോർഡിനെ ഐസിസി വിലക്കിയിരുന്നു. ഇതിന് പിന്നാലെയാണ് ലോകകപ്പ് വേദി നഷ്ടമായത്.
ജനുവരി 14 മുതൽ ഫെബ്രുവരി 14 വരെയാണ് അണ്ടർ 19 ലോകകപ്പ് മത്സരങ്ങൾ. ഇന്ത്യയാണ് നിലവിലെ ചാമ്പ്യൻമാർ. ബംഗ്ലാദേശ്, അയർലൻഡ്, യുഎസ്എ എന്നിവയ്‌ക്കൊപ്പം ഗ്രൂപ്പ് എയിലാണ് ഇന്ത്യ. ഗ്രൂപ്പ് ബിയിൽ ഇംഗ്ലണ്ട്, ദക്ഷിണാഫ്രിക്ക, വെസ്റ്റ് ഇൻഡീസ്, സ്‌കോട്ട്ലൻഡ് എന്നീ ടീമുകളാണുള്ളത്. ഓസ്‌ട്രേലിയ, സിംബാബ്വെ, നമീബിയ എന്നിവർക്കൊപ്പം ഗ്രൂപ്പ് സിയിൽ ശ്രീലങ്ക ഇടംപിടിച്ചിട്ടുണ്ട്. ഗ്രൂപ്പ് ഡിയിൽ അഫ്ഗാനിസ്ഥാൻ, പാകിസ്താൻ, ന്യൂസിലാൻഡ്, നേപ്പാൾ എന്നീ രാജ്യങ്ങളാണുള്ളത്.
