പാൻ- ഇന്ത്യൻ സിനിമകൾ എന്നു പറയുമ്പോൾ നമ്മുടെയെല്ലാം മനസുകളിലേക്ക് ആദ്യം ഓടിയെത്തുന്നത് കെജിഎഫ്, പുഷ്പ, ബാഹുബലി, കൽക്കി, തുടങ്ങിയ സിനിമകളാകും. എന്നാൽ ഒരു പാൻ-വേൾഡ് സിനിമ നമ്മുടെ രാജ്യത്തിൽ നിന്നും ഒരുങ്ങുന്നുവെന്ന് പറഞ്ഞാൽ നിങ്ങൾ വിശ്വസിക്കുമോ? 4, 5 ഭാഷകളിലല്ല, 38 ഭാഷകളിലായി 350 കോടി രൂപ ചിലവഴിച്ച് പുറത്തിറങ്ങുന്ന കങ്കുവ ചിത്രത്തിന്റെ വാർത്തകളാണ് ഇപ്പോൾ സിനിമാ പ്രേമികളിൽ ആവേശം ഉണർത്തുന്നത്. ജനപ്രിയ നായകൻ സൂര്യ കേന്ദ്രകഥാപാത്രമായി എത്തുന്ന ‘കങ്കുവ’ സിനിമ ഒരു പാൻ-വേൾഡ് ചലച്ചിത്രമായാണ് നിർമ്മിക്കുന്നതെന്നാണ് അണിയറ പ്രവർത്തകർ അറിയിച്ചിരിക്കുന്നത്.
സൂര്യയുടെ ജന്മദിനത്തോടനുബന്ധിച്ച് ചിത്രവുമായി ബന്ധപ്പെട്ട ചില കാര്യങ്ങൾ അണിയറപ്രവർത്തകർ പുറത്തുവിട്ടിരിരുന്നു. ഇതിനു പിന്നാലെ സിനിമാ പ്രേമികളെ അമ്പരപ്പിക്കുന്ന വിധത്തിൽ കങ്കുവ സിനിമയുടെ ഫസ്റ്റ് ലുക്ക് പോസ്റ്ററും പങ്കുവച്ചിരുന്നു. ഇതിനുപുറമെ സിനിമ ലോകമെമ്പാടും 38 ഭാഷകളിലായി 3D ഐമാക്‌സിൽ പ്രദർശിപ്പിക്കുമെന്ന വമ്പൻ പ്രഖ്യാപനവുമായാണ് ഇപ്പോൾ അണിയപ്രവർത്തകർ എത്തിയിരിക്കുന്നത്. കങ്കുവ പുറത്തിറങ്ങുന്നതോടു കൂടി ഇന്ത്യൻ സിനിമകളെ ലോകം ഉറ്റുനോക്കുമെന്നാണ് നിർമ്മാതാക്കൾ പറയുന്നത്.
സിരുത്തെ ശിവ സംവിധാനം ചെയ്യുന്ന ചിത്രം സൂര്യയുടെ കരിയറിലെ തന്നെ ബ്രഹ്മാണ്ഡ ചിത്രമാണ്. ദിഷാ പടാനിയാണ് ചിത്രത്തിലെ നായിക. ബോബി ഡിയോളും ചിത്രത്തിൽ പ്രധാന വേഷത്തിലെത്തുന്നുണ്ട്. ഗ്രീൻ സ്റ്റുഡിയോയും യുവി ക്രയേഷൻസും ചേർന്ന് നിർമ്മിക്കുന്ന ചിത്രത്തിന്റെ സംഗീത സംവിധാനം ദേവി ശ്രീ പ്രസാദാണ്. ആദി നാരായണയുടെ തിരക്കഥക്ക് സംഭാഷണമെഴുതുന്നത് മദൻ കർക്കിയാണ്.
