ശ്രീനഗർ: ജമ്മുകശ്മീരിൽ രണ്ട് ലഷ്‌കർ ഇ-ത്വയ്ബ ഭീകരർ പിടിയിൽ. കശ്മീരിലെ ശ്രീനഗറിൽ നിന്നാണ് ഭീകരരെ പിടികൂടിയത്. കുപ്‌വാര സ്വദേശികളായ മുംതാസ് അഹമ്മദ് ലോൺ, ജഹാംഗീർ അഹമ്മദ് ലോൺ എന്നിവരാണ് പിടിയിലായത്. ശ്രീനഗർ പോലീസും അതിർത്തി സുരക്ഷാ സേനയും നടത്തിയ സംയുക്ത തിരച്ചിലാണ് ഭീകരരെ പിടികൂടിയത്. പിടികൂടിയ ഭീകരരിൽ നിന്നും വൻ ആയുധ ശേഖരവും വെടിക്കോപ്പുകളും പോലീസ് കണ്ടെടുത്തിട്ടുണ്ട്.
ശ്രീനഗറിൽ ഭീകരരുടെ സാന്നിധ്യമുണ്ടെന്ന രഹസ്യ വിവരത്തിന്റെ അടിസ്ഥാനത്തിലാണ് ബിഎസ്എഫും പോലീസും സംയുക്തമായി ചേർന്ന് പ്രദേശത്ത് തിരച്ചിൽ നടത്തിയത്. തുടർന്ന് നാക ചെക്ക്‌പോസ്റ്റിൽ വെച്ച് ഭീകരരെ പിടികൂടുകയായിരുന്നു. ഭീകരരിൽ നിന്നും പിസ്റ്റളുകൾ, മാഗസിനുകൾ, ഗ്രനേഡുകൾ എന്നിവ ബിഎസ്എഫ് പിടിച്ചെടുത്തു.
ഭീകരർക്കെതിരെ യുഎപിഎ നിയമ പ്രകാരം കേസെടുത്തിട്ടുണ്ടെന്ന് പോലീസ് അറിയിച്ചു. കേസിൽ കൂടുതൽ അന്വേഷണം നടക്കുന്നുണ്ടെന്ന് ഉദ്യോഗസ്ഥർ വ്യക്തമാക്കി.
