ശ്രീനഗർ: ജമ്മുകശ്മീരിലെ രജൗരിയിൽ സൈന്യവും ഭീകരരും തമ്മിലുണ്ടായ ഏറ്റുമുട്ടലിൽ നാല് സൈനികർക്ക് വീരമൃത്യു. ഏറ്റുമുട്ടലിൽ മൂന്ന് സൈനികർക്ക് പരിക്കേറ്റിട്ടുണ്ട്. ധർമ്മസാലിലെ ബാജിമാൽ പ്രദേശത്ത് നടത്തിയ തിരച്ചിലിനിടെ ഭീകരർ സൈനികർക്ക് നേരെ വെടിയുതിർക്കുകയായിരുന്നു.
പരിക്കേറ്റ സൈനികരെ ആശുപത്രിയിൽ പ്രവേശിപ്പിച്ചിട്ടുണ്ട്. രജൗരി മേഖലയിൽ ഭീകരരുടെ ഒളിത്താവളങ്ങളുണ്ടെന്ന വിവരത്തെ തുടർന്നാണ് ഇന്ന് രാവിലെ മുതൽ സൈന്യം പ്രദേശത്ത് തിരച്ചിൽ നടത്തിയത്. സൈനികരെ കണ്ടതോടെ ഭീകരർ വെടിയുതിർത്തു. തുടർന്ന് ശക്തമായ ഏറ്റുമുട്ടലുണ്ടായതായും ഒരു ഭീകരനെ വധിച്ചതായും സൈന്യം അറിയിച്ചു.
