പനി വരുംപോലെയാണ് ഇന്ന് ഹൃദ്രോഗം. ഹൃദ്രോഗികളുടെ എണ്ണം ക്രമതീതമായി ഉയരുകയാണ്. പ്രായഭേദമന്യേ ഹൃദയം പണി തരുന്നതിന് പിന്നിലെ കാരണമെന്തായിരിക്കാം എന്ന് ചിന്തിക്കുന്നവരാകും പലരും. ഹൃദയാരോഗ്യത്തെ കുറിച്ച് കാര്യമായി ശ്രദ്ധിക്കാത്തത് തന്നെയാണ് പരമപ്രധാനമായ കാര്യം.
മനുഷ്യന്റെ തുടിപ്പ്, ജീവൻ നിലനിർത്താനായി അഹോരാത്രം പ്രയത്നിക്കുന്ന അവയവമാണ് ഹൃദയം. അത്രമേൽ സംരക്ഷണം നൽകേണ്ട അവയവം. ശരീരത്തിന്റെ എല്ലാ ഭാഗങ്ങളിലേക്കും രക്തം പമ്പ് ചെയ്യുന്നതിനും ഓക്സിജൻ എത്തിക്കാനുമെല്ലാം ഹൃദയം നന്നായി പ്രവർത്തിച്ചേ മതിയാകൂ.
പെട്ടെന്നുണ്ടാകുന്ന ‘അറ്റാക്ക്’ ചിലപ്പോളോക്കെ വലിയ അറ്റാക്ക് തന്നെയാകും തരുന്നത്. ഹൃദയപേശികളിലേക്ക് ഓക്സിജനെത്തിക്കുന്ന രക്തപ്രവാഹം തടസ്സപ്പെടുമ്പോഴാണ് ഹൃദയാഘാതം സംഭവിക്കുന്നത്. ഉയർന്ന അളവിൽ പഞ്ചസാരയും ഉപ്പും റിഫൈൻഡ് കാർബുകളും സാച്ചുറേറ്റഡ് കൊഴുപ്പും അടങ്ങിയ ഭക്ഷണം രക്തക്കുഴലുകളിൽ കൊളസ്ട്രോൾ കെട്ടികിടന്ന് ഹൃദയാഘാതത്തിലേക്ക് നയിക്കുന്നു. കൊളസ്ട്രോളിന്റെ പ്രധാന കേന്ദ്രം നമ്മുടെ ആഹാരം തന്നെയാണ്. അതുകൊണ്ട് തന്നെ ആരോഗ്യ കാര്യത്തിൽ അൽപം ശ്രദ്ധിച്ചാൽ ഹൃദയത്തെ പൊന്നുപോലെ സംരക്ഷിക്കാവുന്നതാണ്.
ഹൃദയാരോഗ്യവും ആഹാരശീലങ്ങളുമായി അഭേദ്യബന്ധമാണുള്ളത്. വൻ ആഘാതങ്ങളിൽ നിന്ന് ഹൃദയത്തെ കാത്തുപരിപാലിക്കാൻ ഭക്ഷത്തിൽ പ്രധാനമായും ഉൾപ്പെടുത്തേണ്ട ഒന്നാണ് മത്സ്യം. ഒമേഗ 3-ഫാറ്റി ആഡിഡും പ്രോട്ടീനും അടങ്ങിയിട്ടുള്ള മത്സ്യം കഴിക്കുന്നത് ഗുണം ചെയ്യും. ഹൃദയാരോഗ്യത്തിന് നാരുകൾ അടങ്ങിയ ഭക്ഷണങ്ങൾ കൂടുതലായി കഴിക്കണം. ഗോതമ്പ്, ഓട്സ് , പയറുകൾ, ബീൻസ്, റാഗി, ചോളം എന്നിവ ഡയറ്റിൽ ഉൾപ്പെടുത്തുന്നത് നല്ലതാണ്.
ദിവസവും ഒരുപിടി നട്സ് കഴിക്കുന്നതും ഹൃദയാരോഗ്യത്തിന് നല്ലതാണെന്ന് വിദഗ്ധർ പറയുന്നു. അഞ്ച് വാൾനട്ട് ആഴ്ചയിൽ കഴിക്കുന്ന ഒരാൾക്ക് ഹൃദ്രോഗം വരാനുള്ള സാധ്യത 50 ശതമാനത്തോളം കുറവെന്ന് പഠനങ്ങൾ പറയുന്നു. ഹൃദയത്തിന്റെ ആരോഗ്യത്തിന് സഹായിക്കുന്ന ഒമേഗ 3 ഫാറ്റി ആസിഡ് അടങ്ങിയിട്ടുള്ള അപൂർവം ചില പഴങ്ങളിലൊന്നാണിത്. ബദാം, ചനവിത്തുകൾ, അണ്ടിപരിപ്പുകൾ എന്നിവയും കഴിക്കാവുന്നതാണ്.
കണ്ടാൽ കുഞ്ഞനാണെങ്കിലും ഹൃദയത്തെ സ്ട്രോംഗ് ആക്കാൻ വെളുത്തുള്ളി ബെസ്റ്റാണ്. ഇവ രക്തത്തിലെ കൊഴുപ്പിനെ കുറയ്ക്കുന്നു, ധമനികളെ വികസിപ്പിക്കുന്നു, രക്തം കട്ടപിടിക്കുന്നതിനെ തടഞ്ഞ് രക്തപര്യയനം സുഗമമാക്കുകയും ചെയ്യുന്നു. രക്തസമ്മര്ദ്ദം നിയന്ത്രിക്കാന് സഹായിക്കുന്ന ഉള്ളിയും ഹൃദയത്തെ സംരക്ഷിക്കും. യോഗർട്ടും ഹൃദയത്തെ സംരക്ഷിക്കുന്നു. ഗ്രീൻ ടീ കുടിക്കുന്നതും ഹൃദയത്തെ സംരക്ഷിക്കുന്നു. കൊളസ്ട്രോളിൽ നിന്നും രക്ഷ നേടാനും ആൻറി ഓക്സിഡൻറുകളും വിറ്റാമിനുകളും മറ്റു ധാതുക്കളും ധാരാളം അടങ്ങിയ സ്ട്രോബറി ഡയറ്റിൽ ഉൾപ്പെടുത്തുന്നതും ഹൃദയത്തെ സംരക്ഷിക്കും.
