ഇന്ത്യന്‍ പുരുഷ ക്രിക്കറ്റ് ടീമില്‍ ദ്രാവിഡ് യുഗത്തിന് അന്ത്യമാകുന്നു. പരിശീലകനായുള്ള താരത്തിന്റെ കരാര്‍ നീട്ടില്ലെന്നാണ് സുചന. ടൈംസ് ഓഫ് ഇന്ത്യയുടെ റിപ്പോര്‍ട്ട് അനുസരിച്ച് ടീമിന് പുതിയ പരിശീലകനെ പരിഗണിക്കുന്നുണ്ടെന്നാണ് സൂചന. ലോകകപ്പിലെ കശാല പോരാട്ടമായിരന്നു ഇന്ത്യന്‍ ടീമിനൊപ്പമുള്ള ദ്രാവിഡിന്റെ അവാസന മത്സരമെന്നാണ് ടൈംസ് പറയുന്നത്. രണ്ടുവര്‍ഷത്തെ കരാര്‍ ഫൈനലോടെ അവസാനിച്ചിരുന്നു. പുതിയ ഭാവിയെക്കുറിച്ചുള്ള കാര്യങ്ങള്‍ അറിയില്ലെന്ന് ദ്രാവിഡ് ലോകകപ്പിന് പിന്നാലെ അറിയിച്ചിരുന്നു.
ഓസ്‌ട്രേലിയന്‍ പരമ്പരയില്‍ ഇന്ത്യയുടെ താത്കാലിക പരിശീലകനാകുന്ന ലക്ഷ്മണ്‍ ആകും ടീം ഇന്ത്യയുടെ തുടര്‍ന്നുള്ള പരിശീലകന് ആവുകയെന്നാണ് സൂചന. നിലവില്‍ എന്‍സിഎ ഡയറക്ടറാണ് ലക്ഷ്മണ്‍. ചുമതലയേറ്റെടുക്കാന്‍ മുന്‍താരം താത്പ്പര്യം പ്രകടിപ്പിച്ചിട്ടുണ്ട്. ദീര്‍ഘകാല കരാറിനാണ് ലക്ഷ്മണിന് താത്പ്പര്യം. അങ്ങനെയെങ്കില്‍ പരിശീലകനായി ആദ്യ വെല്ലുവിളി ദക്ഷിണാഫ്രിക്കന്‍ പര്യടനമാകും. ദ്രാവിന്റെ കാലത്ത് ഇന്ത്യന്‍ ടീം കിരീടങ്ങള്‍ നേടിയില്ലെങ്കിലും മോശമല്ലാത്ത പ്രകടനം കാഴ്ചവച്ചിരുന്നു.
അഹമ്മദാബാദിലെത്തി ബിസിസിഐ ഉന്നതരുമായി അദ്ദേഹം കൂടികാഴ്ച നടത്തിയിരുന്നു. അങ്ങനെയെങ്കില്‍ ദ്രാവിഡ് വീണ്ടും എന്‍സിഎ ഡയറക്ടര്‍ സ്ഥാനത്തേക്ക് എത്തിയേക്കും. ദ്രാവിഡിനും പരിശീലന കരാര്‍ നീട്ടുന്നതില്‍ താത്പ്പര്യമില്ല. കുടുംബത്തിനൊപ്പം ചെലവഴിക്കാന്‍ ആഗ്രഹിക്കുന്ന താരം ബെംഗളുരുവില്‍ തന്നെ തുടരാനാണ് ആഗ്രഹിക്കുന്നത്.
