സിനിമയുടെ അണിയറയിൽ നിന്ന് അരങ്ങത്തെത്തിയ മലയാള സിനിമയുടെ ഭാഗ്യതാരമാണ് നടൻ ഇന്ദ്രൻസ്. ഹാസ്യ നടനായി ഒരുകാലത്ത് മലയാളികളെ കുടുകുടെ ചിരിപ്പിച്ചിരുന്ന അദ്ദേഹം പിന്നീട് മലയാള സിനിമയിൽ ശക്തമായ വേഷങ്ങളാണ് കൈകാര്യം ചെയ്യാൻ തുടങ്ങി. മലയാളികൾക്ക് മികച്ച കഥാപാത്രങ്ങൾ സമ്മാനിക്കാൻ തുടങ്ങി. പോയ വർഷം അദ്ദേഹം ദേശീയ അവാർഡും സ്വന്തമാക്കി.
ഇപ്പോഴിതാ തന്റെ ജീവിതത്തിൽ ഒരു സുപ്രധാന തീരുമാനം കൂടി എടുത്തിരിക്കുകയാണ് അദ്ദേഹം. നാലാം ക്ലാസിൽ പഠനം അവസാനിപ്പിച്ചയാളാണ് ഇന്ദ്രൻസ്. വിദ്യാഭ്യാസം കുറവായതിനാൽ ദേശീയ അംഗീകാരം ലഭിച്ചിട്ടും പലയിടത്തും ഒരു പേടിയോടെ പിന്നോട്ട് പോകേണ്ടി വന്ന അവസ്ഥയെക്കുറിച്ച് അദ്ദേഹം പലപ്പോഴും പറഞ്ഞിട്ടുണ്ട്. ജീവിതത്തിൽ ഇനി ഇത്തരത്തിൽ ഒരു അസ്ഥ വരാൻ അനുവദിക്കില്ലെന്ന തീരുമാനത്തിലാണ് അദ്ദേഹം.
ജീവിത പ്രാരാബ്ദങ്ങളാൽ ഒരുകാലത്ത് സാധിക്കാതെ ഒരു വലിയ സ്വപ്നം നേടിയെടുക്കാനുള്ള ഒരുക്കത്തിലാണ് ഇപ്പോൾ ഇന്ദ്രൻസ്. മറ്റൊന്നുമല്ല, പത്താം ക്ലാസ് തുല്യത ക്ലാസിന് ചേർന്നിരിക്കുകയാണ് താരം. 10 മാസമാണ് പഠന കാലയളവ്. തിരുവനന്തപുരം മെഡിക്കൽ കോളേജ് ഹൈസ്കൂളിൽ എല്ലാ ഞായറാഴ്ചയുമാണ് ക്ലാസ് നടക്കുക.
സ്കൂളിൽ പോകാൻ പുസ്തകവും വസ്ത്രവും ഇല്ലെന്ന അവസ്ഥ വന്നപ്പോഴായിരുന്നു വിദ്യാഭ്യാസം മതിയാക്കിയത്. പിന്നീട് വരുമാനത്തിനായി തയ്യൽ ജോലി തിരഞ്ഞെടുക്കുകയായിരുന്നു. എന്നാൽ വായന ശീലം നഷ്ടപ്പെടുത്താതെ എക്കാലവും സൂക്ഷിച്ചു. ഇതിലൂടെയായിരുന്നു കുറെയേറെ കാര്യങ്ങൾ മനസ്സിലാക്കാൻ സാധിച്ചതെന്നും അദ്ദേഹം പറയുന്നു.