മലപ്പുറം: നവകേരള സദസിന്റെ വിളംബര ജാഥയിലും കുട്ടികൾ. പട്ടികവർഗ വിഭാഗത്തിലെ വിദ്യാർത്ഥികളെയാണ് നവകേരള സദസിന്റെ പ്രചാരണത്തിനായി തിരഞ്ഞെടുത്തത്. നിലമ്പൂർ നഗരസഭയുടെ നേതൃത്വത്തിൽ നടന്ന വിളംബര ജാഥയിലാണ് പട്ടികവിഭാഗത്തിൽപ്പെട്ട വിദ്യാർത്ഥികളെ നവകേരള സദസിന്റെ പ്രചാരകരാക്കിയത്.
നിലമ്പൂർ ഇന്ദിരാഗാന്ധി മെമ്മോറിയൽ മോഡൽ റെസിഡൻഷ്യൽ സ്‌കൂളിലെ വിദ്യാർത്ഥികളെയാണ് ജാഥയിൽ പങ്കെടുപ്പിച്ചത്. സംസ്ഥാന സർക്കാരിന്റെ നേട്ടങ്ങൾ എന്ന പേരിൽ ഉയർത്തി കാണിക്കുന്ന പ്ലക്കാർഡുകൾ ഉയർത്തികാട്ടിയായിരുന്നു വിദ്യാർത്ഥികളുടെ വിളംബര ജാഥ നടന്നത്. ഒമ്പത്, പത്ത്, പ്ലസ്‌വൺ, പ്ലസ്ടൂ ക്ലാസുകളിലെ വിദ്യാർത്ഥികളാണ് ജാഥയിലുണ്ടായിരുന്നത്.
നഗരസഭ ചെയർമാനും, ജില്ലാപട്ടിക വർഗ ഓഫിസിൽ നിന്നും കുട്ടികളെ വിട്ടു നൽകണമെന്ന് അറിയിച്ചിരുന്നതായി പ്രധാന അദ്ധ്യാപകൻ പറഞ്ഞു. കഴിഞ്ഞ ദിവസം നവകേരള ബസിനെ വരവേൽക്കുന്നതിനായി സ്‌കൂൾ കുട്ടികളെ കൊണ്ട് മുദ്രാവാക്യം വിളിപ്പിച്ച സംഭവത്തിന് പിന്നാലെയാണ് ഇതുണ്ടായിരിക്കുന്നത്.
