രാജ്യത്ത് ട്രോജൻ ആക്രമണങ്ങൾ വ്യാപകമാവുന്ന സാഹചര്യത്തിൽ മുന്നറിയിപ്പുമായി മെക്രോസോഫ്റ്റ്. സോഷ്യൽ മീഡിയാ മെസേജിംഗ് പ്ലാറ്റ്ഫോമുകൾ വഴിയാണ് നിലവിൽ മൊബൈൽ ബാങ്കിങ് ട്രോജൻ ആക്രമണം കൂടുതലായി നടക്കുന്നത്. അതുകൊണ്ട് തന്നെ വാട്സ് ആപ്പ്, ടെലഗ്രം പോലെയുള്ള മെസേജിംഗ് ആപ്പ് ഉപഭോക്താക്കൾ ജാഗ്രത പാലിക്കണമെന്ന നിർദ്ദേശവും കമ്പനി നൽകിയിട്ടുണ്ട്. മൈക്രോസോഫ്റ്റിന്റെ ഔദ്യോഗിക സുരക്ഷാ ബ്ലോഗിലൂടെയാണ് കമ്പനി മുന്നറിയിപ്പ് നൽകിയത്. വൻതുകയുടെ സാമ്പത്തിക തട്ടിപ്പുകളാണ് ട്രോജൻ ആിക്രമണത്തിലൂടെ നടന്നിട്ടുള്ളത്. അതുകൊണ്ട് തന്നെ എല്ലാവരും സുരക്ഷാ മുൻകരുതൽ സ്വീകരിക്കേണ്ടത് അനിവാര്യമാണ്.
സാധാരണയായി രണ്ട് തരത്തിലുള്ള ആപ്പുകളാണ് തട്ടിപ്പിന് ഉപയോഗിക്കുന്നത്. ബാങ്ക് അക്കൗണ്ട് ലോഗിൻ വിവരങ്ങൾ ചോർത്തുന്നതിനായി നിർമ്മിച്ച
ബാങ്കുകളുടെ വ്യാജ ആപ്പുകളും ക്രെഡിറ്റ് / ഡെബിറ്റ് കാർഡുകളുടെ വിവരങ്ങൾ ചോർത്തുന്നതിനുള്ള വ്യാജ ആപ്പുകളും. ബാങ്കുകൾ, സർക്കാർ ഏജൻസികൾ എന്നിവരുടെ പേരിൽ സമൂഹ മാദ്ധ്യമങ്ങൾ വഴി ഉപഭോക്താക്കളെ ബന്ധപ്പെടും. തുടർന്ന് അവർക്ക് ആപ്പുകൾ ഇൻസ്റ്റാൾ ചെയ്യുന്നതിനുള്ള ലിങ്കുകളും മറ്റും സന്ദേശമായി നൽകും. ഇത് ഇൻസ്റ്റാൾ ചെയ്യുന്നതോടെ ലോഗിൻ ചെയ്യാനായി സ്വകാര്യ വിവരങ്ങൾ നൽകേണ്ടി വരും. ഇതോടെ ഫോണിലെ ബാങ്ക് സംബന്ധമായ വിവരങ്ങളും മറ്റ് സ്വകാര്യ വിവരങ്ങളും ഉൾപ്പെടെ ചോരും.
അപ്ലിക്കേഷനുകൾ ഗൂഗിൾ പ്ലേ സ്റ്റോർ, ആപ്പിൾ ആപ്പ്സ്റ്റോർ പോലുള്ള ഔദ്യോഗിക ആപ്പ്സ്റ്റോറുകളിൽ നിന്ന് മാത്രം ഇൻസ്റ്റാൾ ചെയ്യുകയാണ് ഇത് തടയുവാനുള്ള വഴി. പരിചയമില്ലാത്ത ലിങ്കുകൾ ക്ലിക്ക് ചെയ്യാതിരിക്കുക. ഇമെയിൽ, പരസ്യങ്ങൾ, എസ്എംഎസ്, സമൂഹമാദ്ധ്യമങ്ങളിൽ വരുന്ന സന്ദേശങ്ങൾ എന്നിവ വഴി വരുന്ന ലിങ്കുകൾ തുറക്കാതിരിക്കുക, കൂടാതെ മൈക്രോസോഫ്റ്റ് ഡിഫൻഡർ പോലുള്ള ആപ്പുകൾ ഇൻസ്റ്റാൾ ചെയ്യുക. എന്നിവയെല്ലാം ഒരു പരിധി വരെ ട്രോജൻ ആക്രമണം ചെറുക്കാൻ സഹായിക്കും.