തിരുവനന്തപുരം: വ്യാജ തിരഞ്ഞെടുപ്പ് തിരിച്ചറിയൽ കാർഡ് നിർമ്മിച്ച യൂത്ത് കോൺഗ്രസ് നേതാക്കളെ അറസ്റ്റ് ചെയ്യണമെന്നാവശ്യപ്പെട്ടുകൊണ്ട് പ്രതിഷേധിച്ച് യുവമോർച്ച. സെക്രട്ടറിയേറ്റിലേക്ക് നടത്തിയ പ്രതിഷേധ മാർച്ചിന് നേരെ പോലീസ് ജലപീരങ്കി പ്രയോഗിച്ചു.
യൂത്ത് കോൺഗ്രസ് യുവജന സംഘടനകൾക്ക് നാണക്കേടാണെന്ന് പ്രതിഷേധം ഉദ്ഘാടനം ചെയ്ത് യുവമോർച്ച സംസ്ഥാന അദ്ധ്യക്ഷൻ പ്രഫുൽ കൃഷ്ണൻ പറഞ്ഞു. ക്രമക്കേടിൽ കൃത്യമായ വിവരങ്ങൾ യുവമോർച്ചയുടെ കൈയ്യിലുണ്ട്. പ്രതികളെ പിടിക്കാനും നടപടി എടുക്കാനും പോലീസിന് കഴിയുമോയെന്നും അദ്ദേഹം ചോദിച്ചു.
കേരള പോലീസിനെ കോടതി പോലും ശകാരിച്ചു. വ്യാജ പ്രസിഡന്റാണ് നിലവിൽ യൂത്ത് കോൺഗ്രസിനുള്ളതെന്നും പ്രഫുൽ കൃഷ്ണൻ കൂട്ടിച്ചേർത്തു. സെക്രട്ടറിയേറ്റിലേക്ക് നടന്ന മാർച്ച് ഒരു സൂചന മാത്രമാണെന്നും പോലീസ് നടപടി ശക്തമാക്കിയില്ലെങ്കിൽ പ്രതിഷേധം വ്യാപിപ്പിക്കുമെന്നും പ്രഫുൽ കൃഷ്ണൻ വ്യക്തമാക്കി.
