ഇറ്റാനഗർ: മ്യൂസിക് തവളകളുടെ പുതിയ ഇനത്തെ കണ്ടെത്തി ശാസ്ത്രജ്ഞർ. അരുണാചൽപ്രദേശിലെ നോവ-ദിഹിങ് നദിയിൽ നിന്നാണ് തവളകളെ കണ്ടെത്തിയത്. അരുണാചലിലെ ചാങ്ലാങ്, ലോഹിത് ജില്ലകളിൽ ഫീൽഡ് സർവേ നടത്തിയ ഗവേഷകരാണ് നിധിരാണ ഇനത്തിൽപെട്ട മ്യൂസിക് തവളകളെ കണ്ടെത്തിയത്. ഇന്ത്യയിൽ ആദ്യമായിട്ടാണ് ഇത്തരത്തിലുള്ള തവളകളെ കണ്ടെത്തുന്നത്.
ശരീര പ്രകൃതം, ശബ്ദം, വലുപ്പം എന്നീ ഘടങ്ങളാണ് ഇവയെ മറ്റുള്ള തവളകളിൽ നിന്നും വ്യത്യസ്തമാക്കുന്നത്. മൂന്ന് ആൺതവളകളെയും രണ്ട് പെൺ തവളകളെയുമാണ് കണ്ടെത്തിയത്. സാധാരണയായി ചതുപ്പ് നിലങ്ങൾ, തടാകം, കുളം എന്നിങ്ങനെയുള്ള സ്ഥലങ്ങളിലാണ് ഇത്തരം തവളകൾ ഏറ്റവുമധികം കാണാപ്പെടാറുള്ളത്. നോവ-ദിഹിങ് നദിയിൽ നിന്നും കണ്ടെത്തിയതിനാൽ ഇവയ്ക്ക് നോവ-ദിഹിങ് മ്യൂസിക് ഫ്രോഗ് എന്നും നിധിരാണ നോവ-ദിഹിങ് എന്നും പേര് നൽകി.
വ്യത്യസ്തമായ ശബ്ദമാണ് ഇവ പുറപ്പെടുവിക്കാറ്, കൂടാതെ മറ്റ് തവളകളെ അപേക്ഷിച്ച് വലുപ്പം കൂടുതലാണ്. ഇവ മുട്ടയിടുന്നതിനായി കൂടൊരുക്കുകയും ചെയ്യും. സാമാന്യം വലിയ കണ്ണുകളാണ് ഈ ഉഭയ ജീവികൾക്കുള്ളത്. ക്രമരഹിതമായ വലുപ്പവും ആകൃതിയുമുള്ള അടയാളങ്ങൾ കണ്ണുകൾക്ക് മുകളിൽ കാണാനാകും. അതോടൊപ്പം സ്വർണ നിറത്തിലുള്ള വളയങ്ങളാണ് കൃഷ്ണമണികൾക്കുള്ളത്. ഇവയുടെ ശരീരത്തിന് തവിട്ട് നിറവും പിങ്ക് നിറവും കൂടിചേർന്ന നിറമാണുള്ളത്. ചെറിയ വരകളും ശരീരത്തിൽ കാണാം. ആൺ തവളകൾ 1.8 ഇഞ്ച് മുതൽ 2.3 ഇഞ്ച് വരെ വലുപ്പവും പെൺ തവളകൾ 2.4 ഇഞ്ച് മുതൽ 2.6 ഇഞ്ച് വരെ വലുപ്പവും ഉണ്ടാകും. ജപ്പാൻ, തായ് വാൻ, തായ്ലൻഡ്, വിയറ്റ്നാം തുടങ്ങിയ രാജ്യങ്ങളിലാണ് ഇവയെ പ്രധാനമായും കാണാൻ കഴിയുക.
