നടൻ അശോകനെ ഇനി മുതൽ ഒരു വേദിയിലും അനുകരിക്കില്ലെന്ന് നടനും മിമിക്രി താരവുമായ അസീസ് നെടുമങ്ങാട്. അസീസ് തന്നെ അനുകരിക്കുന്നത് മോശമായാണെന്നും തനിക്കത് ഇഷ്ടമല്ലെന്നും ഒരു ചാനലിന് നൽകിയ അഭിമുഖത്തിൽ അശോകൻ വെളിപ്പെടുത്തിയിരുന്നു. ഇത് വലിയ ചർച്ചകൾക്കും വഴിയൊരുക്കി. ഇതിനെപ്പറ്റിയുള്ള മാദ്ധ്യമ പ്രവർത്തകരുടെ ചോദ്യത്തിനാണ് ഇനി അശോകനെ അനുകരിക്കില്ലെന്ന് അസീസ് വ്യക്തമാക്കിയത്.
‘ആ ഇന്റർവ്യൂ കണ്ടിരുന്നു. അശോകേട്ടന്റെ സുഹൃത്ത് തന്നെയാണ് എനിക്ക് വിഡീയോ അയച്ചു തന്നത്. അത് പുള്ളിയുടെ ഇഷ്ടം. ഇപ്പോൾ നമ്മൾ ഒരാളെ അനുകരിക്കുമ്പോൾ അത് അരോചകമായി തോന്നിയാൽ അത് തുറന്നു പറയണം. അത് അഭിപ്രായ സ്വാതന്ത്ര്യമാണ്. അദ്ദേഹത്തിന് അങ്ങനെ തോന്നിയിട്ടുണ്ടാകാം. പക്ഷേ, ഞാനൊരു തീരുമാനമെടുത്തു. ഇനി അശോകേട്ടനെ അനുകരിക്കില്ല, നിർത്തി’- അസീസ് പറഞ്ഞു. ‘പഴഞ്ചൻ പ്രണയം’ എന്ന തന്റെ പുതിയ സിനിമയുടെ പ്രമോഷനുമായി ബന്ധപ്പെട്ട് നടത്തിയ പ്രസ്മീറ്റിൽ സംസാരിക്കുകയായിരുന്നു താരം.
‘അമരം സിനിമയിലെ എന്റെ നോട്ടത്തെ കളിയാക്കിയാണ് പലരും മിമിക്രി ചെയ്യുന്നത്. കളിയാക്കുന്നത് കണ്ടാൽ മനസിലാവും. അത്രയ്ക്കൊന്നും ഞാൻ നോക്കിയിട്ടില്ല. മിമിക്രിയെന്ന് പറയുമ്പോൾ കുറച്ചധികം അവർ കയ്യിൽ നിന്നിട്ട് കളിക്കുന്നതാണല്ലോ. അസീസ് ആ ഗണത്തിൽ പെട്ടതാണ്. അയാൾ അത്ര നന്നായി എന്നെ അനുകരിക്കുന്നതായി എനിക്ക് തോന്നിയിട്ടില്ല. ഓവറാക്കി കളിയാക്കുന്നത് പോലെയാണ് തോന്നിയത്’- എന്നായിരുന്നു അശോകൻ പ്രതികരിച്ചിരുന്നത്.
