ഫേസ്ബുക്ക് സിഇഒ മാർക്ക് സക്കർബർഗിന്റെ ഒരു ദിനം എങ്ങനെയാണ് തുടങ്ങുന്നതെന്ന് നിങ്ങൾ എപ്പോഴെങ്കിലും ചിന്തിച്ചിട്ടുണ്ടോ? അതിന്റെ ഉത്തരം മാർക്ക് തന്നെ ഇപ്പോൾ വെളിപ്പെടുത്തിയിരിക്കുകയാണ്. തന്റെ ഒരു ദിനം ആരംഭിക്കുന്നത് 8 മണിക്കുള്ള ആയോധന കലകളോടെയാണെന്നാണ് മാർക്ക് പറയുന്നത്. ആയോധനകലകളുടെ പരിശീലത്തിനു ശേഷം ടെയ്ലർ സ്വിഫിറ്റിന്റെ ഗാനങ്ങൾ അൽപ സമയം മക്കളോടൊപ്പം ആസ്വദിച്ചിരിക്കും. പിന്നീട് ഏകദേശം 4,000 കലോറിയടങ്ങിയിട്ടുള്ള ഭക്ഷണങ്ങൾ കഴിക്കാൻ പ്രത്യേകം ശ്രദ്ധിക്കും. പക്ഷേ ഇതൊക്കെയാണെങ്കിലും തനിക്ക് ഒരു മോശം സ്വഭാവമുണ്ടെന്നാണ് അദ്ദേഹത്തിന്റെ അഭിപ്രായം.
ഉറക്കമുണർന്നാൽ ആദ്യം തന്റെ കൈകൾ തേടുന്നത് മൊബൈൽ ഫോണിനെയാണ്. രാവിലെ തന്നെ ഫേസ്ബുക്കിൽ ലോകത്ത് എന്തൊക്കെ നടക്കുന്നുണ്ടെന്ന് നോക്കും അതിനു ശേഷമാണ് മറ്റു കാര്യങ്ങൾക്ക് മുൻഗണന നൽകുകയെന്നാണ് അദ്ദേഹം പറയുന്നത്. ഈ ശീലം നല്ലതല്ലെന്നും തനിക്കിത് മാറ്റണമെന്നുണ്ടെങ്കിലും അത് സാധിക്കുന്നില്ലെന്നുമായിരുന്നു മാർക്ക് വെളിപ്പെടുത്തിയിരിക്കുന്നത്. ഏതൊരു സാധാരണക്കാരനും ചെയ്യുന്ന ശീലമായിരിക്കും ഇതെങ്കിലും ഒരു ദിവസം ഫോണിൽ നിന്നും തുടങ്ങുന്നത് മോശമായ ഒരു കാര്യമാണെന്ന് ഫേസ്ബുക്ക് സിഇഒ തന്നെ പറയുന്നു.
