2025 ലെ ചാമ്പ്യൻസ് ട്രോഫിയ്ക്ക് ആതിഥേയത്വം വഹിക്കാനുള്ള താത്പര്യം പ്രകടിപ്പിച്ച് ഐസ്ലൻഡ് ക്രിക്കറ്റ് ബോർഡ്. ട്വിറ്ററിലൂടെയാണ് ഐസ് ലൻഡ് ക്രിക്കറ്റ് ബോർഡ് ഇക്കാര്യം അറിയിച്ചത്. പിസിബിയെ പരിഹസിച്ച് കൊണ്ടായിരുന്നു ട്വീറ്റ്. ഇന്ത്യയും പാകിസ്താനും തമ്മിലുള്ള നയതന്ത്ര പ്രശ്നങ്ങളാണ് വേദിമാറ്റത്തിന് കാരണമെന്നാണ് റിപ്പോർട്ടുകൾ സൂചിപ്പിക്കുന്നത്. യുഎഇ ചാമ്പ്യൻസ് ട്രോഫിയ്ക്ക് വേദിയാകുമെന്ന അഭ്യൂഹങ്ങൾക്കിടയിലാണ് ഐസിസി ചെയർമാൻ ഗ്രെഗ് ബാർക്ലേയക്ക് ഐസ്ലൻഡ് ക്രിക്കറ്റ് ബിഡ് സമർപ്പിച്ചിരിക്കുന്നത്.
പാകിസ്താനുള്ളതു പോലെ വെല്ലുവിളി നിറഞ്ഞ സാഹചര്യമല്ല ചാമ്പ്യൻസ് ട്രോഫി നടത്താനായി ഞങ്ങൾക്കുള്ളത്. മികച്ച വേദികളും മികച്ച സൗകര്യങ്ങളും ഇവിടെയുണ്ട്. ഞങ്ങൾ ടൂർണമെന്റിൽ നിന്ന് പിന്നോട്ട് പോകുന്ന ആളുകളല്ല. 2025- ലെ ചാമ്പ്യൻസ് ട്രോഫിക്ക് ആതിഥേയത്വം വഹിക്കാനുള്ള ഞങ്ങളുടെ ബിഡ് ഞങ്ങൾ ഐസിസിക്ക് സമർപ്പിച്ചു. ഐസിസി ചെയർമാൻ ഗ്രെഗ് ബാർക്ലേയുടെ അഭിപ്രായം അറിയുവാനായി ഞങ്ങൾ കാത്തിരിക്കുകയാണ്. – ഐസ്ലൻഡ് ക്രിക്കറ്റ് ട്വിറ്ററിൽ കുറിച്ചു.
ഏഷ്യ കപ്പ് മത്സരങ്ങൾക്കായി ഇന്ത്യ പാകിസ്താനിലേക്ക് യാത്ര ചെയ്യില്ലെന്ന് അറിയിച്ചതോടെയാണ് ഹൈബ്രിഡ് മോഡലിൽ ശ്രീലങ്കയും വേദിയാക്കി ഏഷ്യാ കപ്പ് മത്സരങ്ങൾ ഐസിസി നടത്തിയത്. അതേ രീതിയിൽ ചാമ്പ്യൻസ് ട്രോഫി ടൂർണമന്റ് നടത്താനും ഐസിസിയ്ക്ക് താത്പര്യമുണ്ടെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നുണ്ട്.