രുചികളിൽ ചിലർക്കെങ്കിലും ഇഷ്ടമുള്ളതാണ് പുളി. ഇന്ത്യൻ ഭക്ഷണ രുചികളിൽ പുളിയുടെ സ്ഥാനം വലുതാണ്. പലതരം ഭക്ഷണങ്ങളിലും പുളി ഉപയോഗിക്കാറുണ്ട്. എന്നാൽ ഭൂരിഭാഗം പേരും ആരോഗ്യത്തിന് നല്ലതല്ല എന്ന് പറഞ്ഞ് പുളിയുടെ ഉപയോഗം വിലക്കാറുണ്ട്. ഇവയുടെ ഗുണങ്ങൾ പലപ്പോഴും ആരും ശ്രദ്ധിക്കാറില്ല.
പുളി അഥവാ ഇംലിയുടെ ഗുണങ്ങൾ ചെറുതൊന്നുമല്ല. ഹൃദയാരോഗ്യം വർദ്ധിപ്പിക്കാനും പ്രതിരോധശേഷി വർദ്ധിപ്പിക്കാനും പുളിക്കാവും. രക്തസമ്മർദ്ദം ക്രമമായി നിലനിർത്താൻ സഹായിക്കുന്ന പൊട്ടാസ്യം, മഗ്നീഷ്യം എന്നിവയുടെ ഉറവിടമാണ് പുളി. കൂടാതെ കൊളസ്ട്രോൾ നിയന്ത്രിക്കാൻ സഹായിക്കുന്ന ഫേളേവനോയ്ഡുകളും ഇതിൽ അടങ്ങിയിട്ടുണ്ട്.
പുളിയിൽ അടങ്ങിയിട്ടുള്ള വിറ്റാമിൻ സി, ആന്റി ഓക്സിഡൻറുകൾ, ഫ്ലേവനോയ്ഡുകൾ, കരോട്ടീനുകൾ, മറ്റ് പോഷകങ്ങൾ എന്നിവ രോഗപ്രതിരോധ ശേഷി വർദ്ധിപ്പിക്കാൻ സഹായിക്കും. പുളി ക്ലീനിംഗ് ഏജന്റ്, ഫീബ്രിഫ്യൂജ്, കാർമിനേറ്റീവ്, ആന്റിസെപ്റ്റിക്, ടോണിക്ക് എന്നിവയായെല്ലാം പ്രവർത്തിക്കും. അതിനാൽ കുടലിന്റെ പ്രവർത്തനത്തെയും ദഹനത്തെയും നിയന്ത്രിക്കാൻ ഇത് സഹായിക്കും.
പുളി നാരുകളാൽ സമ്പുഷ്ടമാണ്, കൊഴുപ്പ് അടങ്ങിയിട്ടില്ല. ഫ്ളേവനോയ്ഡുകളും പോളിഫെനോളുകളും അടങ്ങിയിരിക്കുന്നതിനാൽ ദിവസവും പുളി കഴിക്കുന്നത് ശരീരഭാരം കുറയ്ക്കാൻ സഹായിക്കുമെന്ന് പഠനങ്ങൾ സൂചിപ്പിക്കുന്നു. കൂടാതെ രക്തത്തിലെ പഞ്ചസാരയുടെ അളവ് കുറയ്ക്കാൻ സഹായിക്കുന്ന ആൽഫ-അമൈലേസ് എന്ന എൻസൈമും പുളിയിൽ കാണാം. അതിനാൽ പുളിയുടെ ഉപയോഗം പ്രമേഹം നിയന്ത്രിക്കുവാൻ സഹായിക്കും.
