കൊല്ലം: ജില്ലയിൽ ഡിസംബർ ഒന്ന് മുതൽ ഫെബ്രുവരി 29 വരെ കക്ക വാരുന്നതിൽ നിരോധനം ഏർപ്പെടുത്തി ജില്ലാ കളക്ടർ ഉത്തരവ് പുറത്തിറക്കി. കറുത്ത കക്ക, കല്ലുമ്മക്കായ എന്നിവയെ ഒഴിവാക്കിയാണ് ഇത്തവണ ഉത്തരവ് പുറത്തിറക്കിയത്. മഞ്ഞ കക്ക വളരുന്ന പ്രദേശങ്ങളിലാണ് ഇക്കൊല്ലത്തെ നിരോധനം ബാധകമെന്ന് കളക്ടർ വ്യക്തമാക്കി.
താന്നി പ്രദേശത്തിന്റെ തെക്ക് ഭാഗം മുതൽ മണിയംകുളം റെയിൽപാലത്തിന് പടിഞ്ഞാറ് ഭാഗം വരെയുള്ള പരവൂർ കായൽ പ്രദേശം, അഷ്ടമുടി കായലിന്റെ ഭാഗമായ ചവറ കായൽ പൂർണമായും, സെൻട്രൽ കായൽ അഴിമുഖം മുതൽ വടക്കോട്ട് പുളിമൂട്ടിൽ കടവ്, തെക്ക് മണലികടവ് വരെ, തെക്ക് പടിഞ്ഞാറ് കാവനാട് ബൈപാസ് പാലം വരെ, കായംകുളം കായലിൽ ടിഎസ് കനാൽ അഴീക്കൽ പാലം മുതൽ വടക്ക്- പടിഞ്ഞാറ് അഴിമുഖം വരെ, വടക്ക്-കിഴക്ക് ആയിരംതെങ്ങ് ഫിഷ്ഫാം കഴിഞ്ഞുള്ള ടിഎം തുരുത്ത് എന്നിവിടങ്ങളിലാണ് നിരോധനം ഏർപ്പെടുത്തിയിരിക്കുന്നത്.
ഈ പ്രദേശങ്ങളിൽ നിന്നും നിരോധന കാലയളവിൽ മഞ്ഞ കക്ക വാരൽ-വിപണനം, ഓട്ടി വെട്ടൽ ശേഖരണം, പൊടി കക്ക ശേഖരണം എന്നിവ ശിക്ഷാർഹമായിരിക്കുമെന്ന് ഫിഷറീസ് ഡെപ്യൂട്ടി ഡയറക്ടർ വ്യക്തമാക്കി.
