മുംബൈ: 2000 രൂപാ നോട്ടുകളിൽ 97.26 ശതമാനവും നവംബർ അവസാനത്തോടെ തിരിച്ചെത്തിയതായി ആർബിഐ അറിയിച്ചു. ഇനി എത്താനുള്ളത് 9,760 കോടി രൂപയുടെ നോട്ടുകളാണ്. ഒക്ടോബർ മാസം വരെ 97 ശതമാനം നോട്ടുകൾ തിരിച്ചെത്തിയിരുന്നു. ഒരു മാസത്തിനുള്ളിൽ 0.26 ശതമാനത്തിന്റെ വർദ്ധനവാണ് രേഖപ്പെടുത്തിയിരിക്കുന്നത്.
നോട്ടുകൾ തിരിച്ചെത്തിക്കാൻ ആർബിഐയുടെ വിവിധ ശാഖകളിൽ ഇപ്പോഴും ജനങ്ങൾ എത്തിക്കൊണ്ടിരിക്കുകയാണ്. ഇനിയും നോട്ടുകൾ തിരിച്ചേൽപ്പിക്കാത്തവർ പോസ്റ്റൽ സൗകര്യം ഉപയോഗിച്ച് നോട്ടുകൾ മാറ്റിയെടുക്കാൻ ആർബിഐ നിർദ്ദേശം നൽകിയിരുന്നു.
2023 മെയ് 19-നാണ് 2000 രൂപ നോട്ടുകളുടെ വിനിമയം നിർത്തലാക്കുന്നതായി ആർബിഐ പ്രഖ്യാപിച്ചത്. സെപ്റ്റംബർ 30-നകം നോട്ടുകൾ ബാങ്കിൽ തിരിച്ചേൽപ്പിക്കാനും നിർദ്ദേശം നൽകി. പിന്നീട് ഒക്ടോബർ ഏഴ് വരെ സമയപരിധി നീട്ടി. എല്ലാ ബാങ്ക് ശാഖകളിലും 2000 രൂപാ നോട്ട് മാറ്റി എടുക്കാനുള്ള സൗകര്യവും ഉണ്ടായിരുന്നു.
