ഉത്തരകൊറിയയുടെ ഭരണാധികാരി കിം ജോങ് ഉൻ മനുഷ്യത്വ രഹിതമായ പ്രവർത്തികൾ കൊണ്ട് കുപ്രസിദ്ധി നേടിയയാളാണ്. ഇതിൽ നിന്നും വ്യത്യസ്തമായി വിശ്വസിക്കാൻ അല്പം പ്രയാസമുള്ള കിമ്മിന്റെ വീഡിയോ പുറത്തുവന്നിട്ടുണ്ട്. സ്വേച്ഛാധിപതി കിം ജോങ് ഉൻ കരയുന്നതും കണ്ണിൽ നിന്ന് കണ്ണുനീർ ഒഴുകുന്നതും വീഡിയോയിൽ കാണാം. കൂടുതൽ കുട്ടികളുണ്ടാകാൻ ഉത്തരകൊറിയയിലെ സ്ത്രീകളോട് അഭ്യർത്ഥിക്കുന്നതിനിടയിലാണ് കിം പൊട്ടിക്കരഞ്ഞതെന്ന് പറയപ്പെടുന്നു.
ഉത്തരകൊറിയയിലെ ജനനനിരക്ക് കുറയുന്ന സാഹചര്യത്തിൽ, കൂടുതൽ കുട്ടികളെ ജനിപ്പിക്കാൻ കിം തന്റെ രാജ്യത്തെ സ്ത്രീകളോട് അഭ്യർത്ഥിക്കുകയായിരുന്നു. ‘ദേശ ശക്തി’ ശക്തിപ്പെടുത്താൻ കൂടുതൽ കുട്ടികളെ ജനിപ്പിക്കണമെന്ന് കിം ഉത്തരകൊറിയൻ സ്ത്രീകളോട് ആവശ്യപ്പെട്ടു.
തലസ്ഥാനമായ പ്യോങ്യാങ്ങിൽ നടന്ന ഒരു വനിതാ പരിപാടിയിൽ കിം ജോങ് ഉൻ കരയുന്നതും വെളുത്ത തൂവാല കൊണ്ട് കണ്ണുകൾ തുടയ്ക്കുന്നതും സോഷ്യൽ മീഡിയയിൽ പങ്കുവെച്ച ഒരു വീഡിയോയിൽ കാണാം.’ജനനനിരക്ക് കുറയുന്നത് തടയുക, കുട്ടികളെ നന്നായി പരിപാലിക്കുക, അവർക്ക് നല്ല വിദ്യാഭ്യാസം നൽകുക എന്നിവ നമ്മുടെ അമ്മമാരുമായി ചേർന്ന് പരിഹരിക്കേണ്ട കുടുംബ പ്രശ്നങ്ങളാണ്’ എന്ന് പരിപാടിക്കിടെ കിം പറഞ്ഞതായി മാദ്ധ്യമ റിപ്പോർട്ടുകൾ പറയുന്നു.
കഴിഞ്ഞ ദശകങ്ങളിൽ ഉത്തരകൊറിയയുടെ ജനനനിരക്ക് ഗണ്യമായി കുറഞ്ഞതായി യുഎൻ കണക്കുകൾ വ്യക്തമാക്കുന്നു. ഉത്തരകൊറിയയെപ്പോലെ, അയൽരാജ്യമായ ദക്ഷിണകൊറിയയും ജനനനിരക്കിൽ വൻ ഇടിവാണ് നേരിടുന്നത്. ദക്ഷിണ കൊറിയയുടെ ഫെർട്ടിലിറ്റി നിരക്ക് ലോകത്തിലെ ഏറ്റവും താഴ്ന്നതാണ്. ഹൈസ്കൂൾ ഫീസ്, കുട്ടികളെ പരിപാലിക്കാനുള്ള കഴിവില്ലായ്മ, പുരുഷ കേന്ദ്രീകൃത കോർപ്പറേറ്റ് സമൂഹം എന്നിവയാണ് ജനനനിരക്ക് കുറയാനുള്ള പ്രധാന കാരണങ്ങൾ.
1970-1980 കളിൽ, യുദ്ധാനന്തരം ജനസംഖ്യാ വളർച്ച മന്ദഗതിയിലാക്കാൻ ഉത്തര കൊറിയ ജനന നിയന്ത്രണ പദ്ധതികൾ നടപ്പാക്കി. എന്നാൽ 1990-കളുടെ മധ്യത്തിൽ ഒരു ക്ഷാമം ഉണ്ടായി, അതിൽ ലക്ഷക്കണക്കിന് ആളുകൾ മരിച്ചു. ഇക്കാരണത്താൽ, ഉത്തര കൊറിയയിലെ ജനസംഖ്യ കുറയാൻ തുടങ്ങി. 2034ഓടെ ഉത്തരകൊറിയയിലെ ജനസംഖ്യ ഇനിയും കുറയുമെന്നാണ് ഹ്യൂണ്ടായ് ഇൻസ്റ്റിറ്റ്യൂട്ടിന്റെ റിപ്പോർട്ട്. 2070 ആകുമ്പോഴേക്കും ഉത്തരകൊറിയയിലെ ജനസംഖ്യ 23.7 ദശലക്ഷമായി കുറയുമെന്ന് കണക്കാക്കപ്പെടുന്നു. 2021ലെ കണക്കുകൾ പ്രകാരം ഉത്തര കൊറിയയുടെ ജനസംഖ്യ 26 ദശലക്ഷമാണ്.
