പ്ലേ സ്റ്റോറിലെ ആപ്പുകളിൽ വ്യക്തിഗത വിവരങ്ങൾ ഉപയോക്താക്കളെ ചൂഷണം ചെയ്യാൻ കഴിയുന്ന തരത്തിലുള്ള സ്പെലോൺ മാൽവെയറുകൾ കണ്ടെത്തി. ആൻഡ്രോയിഡ് ഉപയോക്താക്കൾ ദശലക്ഷകണക്കിന് തവണ ഡൗൺലോഡ് ചെയ്ത ലോൺ ആപ്പുകളിലടക്കമാണ് മാൽവെയർന്റെ സാന്നിദ്ധ്യം കണ്ടെത്തിയിട്ടുള്ളത്. ഈ വർഷം പ്ലേ സ്റ്റോറിലെ 18 ആപ്പുകളിലാണ് സ്പെലോൺ മാൽവെയർ കണ്ടെത്തിയിട്ടുള്ളത്.
ഈ പണമിടപാട് ആപ്പുകൾ ഫോണിൽ ഡൗലോഡ് ചെയ്യുന്നത് വഴി അവരുടെ വ്യക്തി വിവരങ്ങൾ വളരെ സുഗമമായി ഹാക്ക് ചെയ്യാൻ കഴിയും. ആപ്പുകളിൽ നിന്നും ലോൺ വാങ്ങി കഴിഞ്ഞ ഉപഭോക്താവിനെ വ്യക്തി വിവരങ്ങൾ കാണിച്ച് ഭീക്ഷണിപ്പെടുത്തി കൂടുതൽ പണം തിരിച്ചടക്കാൻ നിർബന്ധിക്കും. ആളുകളിൽ കൂടുതൽ ആകർഷണം ഉണ്ടാക്കുന്ന രീതിയിലാണ് ഇത്തരത്തിലുള്ള ലോൺ ആപ്പുകൾ നിർമ്മിച്ചത്. അതോടൊപ്പം ആകർഷകമായ ലോൺ സ്കീമുകളുമാണ് നൽകുക. ആഫ്രിക്ക, ഏഷ്യ, ലാറ്റിൻ അമേരിക്ക എന്നിവടങ്ങളിലുള്ളവരെയാണ് ഇവ പ്രധാനമായും ലക്ഷ്യമിട്ടിരിക്കുന്നതെന്നും സുരക്ഷാ ഗവേഷകർ അറിയിച്ചു.
ആപ്പുകൾ ഡൗൺലോഡ് ചെയ്തതിന് ശേഷം ഉപയോക്താവിന്റെ സ്വകാര്യ വിവരങ്ങൾ ഉൾപ്പെടുത്താൻ പറയും. കൂടാതെ ഫോണിലെ ക്യാമറ, കോൾ ലോഗ്, വൈഫൈ നെറ്റ് വർക്ക് വിവരങ്ങൾ, ചിത്രങ്ങൾ, മെസേജസ്, കോൺടാക്ട് ഉൾപ്പെടെയുള്ള നിരവധി കാര്യങ്ങൾക്ക് ആക്സസ് നൽകാനുള്ള അനുമതിയും ഉപയോക്താവ് നൽകേണ്ടി വരും. ആക്സസ് കിട്ടികഴിഞ്ഞാൽ ഈ വിവരങ്ങൾ ആപ്പുകാർ കൈക്കലാക്കും. തുടർന്ന് ഉപയോക്താക്കൾക്ക് ലോണെടുത്ത തുക തിരിച്ചടയ്ക്കാൻ മതിയായ സമയം നൽകുന്നതിന് പകരം, സ്പൈലോൺ ആപ്പുകൾ ഉപയോക്താവിന് തുക തിരിച്ചടയ്ക്കുന്നതിനുള്ള സമയം കുറയ്ക്കും. പണം തിരിച്ചടക്കാൻ കഴിയാതെ വന്നാൽ സ്വകാര്യ വിവരങ്ങൾ കാണിച്ച് ഭീഷണിപ്പെടുത്തി കൂടുതൽ തുക അടക്കാൻ നിർബന്ധിക്കും.
കെവൈസി സംവിധാനം പൂർത്തീകരിക്കുകയും മറ്റ് പേപ്പർ വർക്കുകൾ നടത്തിയാലും മാത്രമേ സാധാരണ ആപ്പുകൾക്ക് പ്ലേ സ്റ്റോറിൽ ഉൾപ്പെടാൻ പറ്റു. അതുകൊണ്ട് തന്നെ ആപ്പുകൾ ഒറിജിനലാണെന്ന് തെളിയിക്കുന്നതിന് വേണ്ടി ജീവനക്കാരുടെ വിശദവിരങ്ങളും ഫോട്ടോകളും ഉൾപ്പെടുത്തി വ്യാജ വെബ്സൈറ്റുകളും ഈ ആപ്പുകൾ നിർമ്മിക്കുന്നുണ്ട്. ഇത്തരത്തിലുള്ള 18 സ്പെലോൺ ആപ്പുകളിൽ 17 എണ്ണം പ്ലേ സ്റ്റോറിൽ നിന്നും ഗൂഗിൾ നീക്കം ചെയ്തിട്ടുണ്ട്.
