ആദ്യമായി ചന്ദ്രനിലേയ്ക്ക് ഒരു സ്വകാര്യ കമ്പനി പേടകം വിക്ഷേപിക്കാൻ ഒരുങ്ങുന്നു. പെരെഗ്രിൻ ലൂണാർ ലാൻഡർ ഡിസംബർ 24-ന് ചന്ദ്രനിലേക്കുള്ള യാത്ര ആരംഭിക്കും. നാസയുടെ കൊമേഷ്യൽ ലൂണാർ പേലോഡ് സർവീസിന്റെ ഭാഗമായാണ് ഈ ലാന്റർ വിക്ഷേപിക്കുന്നത്. സ്വകാര്യ സ്ഥാപനങ്ങളുടെ സഹായത്തോടെ ചന്ദ്രനിലേക്കുള്ള ദൗത്യങ്ങൾ വികസിപ്പിക്കുന്നതാണ് കൊമേഷ്യൽ ലൂണാർ പേലോഡ് സർവീസ്.
1.9 മീറ്റർ ഉയരമാണ് ഈ ലൂണാർ ലാൻഡറിനുള്ളത്. സയന്റിഫിക് ഉപകരണങ്ങളും മറ്റ് പേലോഡ്സും ചന്ദ്രോപരിതലത്തിൽ എത്തിക്കാൻ കഴിയുന്ന രീതിയിലാണ് ഇതിന്റെ രൂപകല്പന. ചന്ദ്രോപരിതലത്തിലുള്ള സിനസ് വിസ്കോസ്റ്റാറ്റിസ് മേഖലയെ ലക്ഷ്യമിട്ട് കൊണ്ടാണ് പ്രധാനമായും പെരെഗ്രിൻ ലൂണാർ ലാൻഡർ പര്യവേക്ഷണം നടത്തുന്നത്.
ചന്ദ്രനിലെ റെഗോലിത്തിന്റെ താപഗുണങ്ങൾ ഹൈഡ്രജൻ സാന്നിധ്യം എന്നിവ വിലയിരുത്തുക, ചന്ദ്രന്റെ എക്സോസ്ഫിയറിനെ കുറിച്ച് പഠിക്കുക, വികിരണങ്ങളെ കുറിച്ച് പഠിക്കുക, പുതിയ സോളാർ പാനലുകൾ പരീക്ഷിക്കുക, കാന്തിക മണ്ഡലങ്ങളെ കുറിച്ച് പഠിക്കുക എന്നിവയാണ് ലൂണാർ ലഡാറിന്റെ പ്രധാന ലക്ഷ്യങ്ങൾ.
ലേസർ റെട്രോ റിഫ്ളക്ടർ അരേ (എൽആർഎ), ലീനിയർ എനർജി ട്രാൻസ്ഫർ സ്പെക്ട്രോമീറ്റർ (എൽഇടിഎസ്), നിയർ ഇൻഫ്രാറെഡ് വൊളാറ്റിൽ സ്പെക്ട്രോമീറ്റർ സിസ്റ്റം (എൻഐആർവിഎസ്എസ്), പ്രൊസ്പെട് ഐയോൺ-ട്രാപ്പ് മാസ് സ്പെക്ട്രോമീറ്റർ (പിഐടിഎംഎസ്), എന്നിവ ഉൾപ്പടെ 10 പേലോഡുകളാണ് പെരെഗ്രിൻ ലൂണാർ ലഡാറിലൂടെ ചന്ദ്രനിലേക്ക് അയക്കുക.
