നായകനായി രോഹിത് ശര്‍മ്മയെ പരിഗണിക്കുമ്പോഴും വിരാട് കോലിയെ ടി20 ലോകകപ്പ് ടീമിലേക്ക് പരിഗണിക്കില്ലെന്ന് സൂചന. വിന്‍ഡീസിലും യു.എസ്.എയിലുമായി ലോകകപ്പില്‍ താരത്തെ പരിഗണിക്കേണ്ടതില്ലെന്നാണ് ടീം മാനേജ്‌മെന്റിന്റെ തീരുമാനമെന്ന് ബിസിസിഐയെ ഉദ്ദരിച്ച് ദേശീയ മാദ്ധ്യമങ്ങള്‍ റിപ്പോര്‍ട്ട് ചെയ്യുന്നു. ജസ്പ്രീത് ബുമ്രയും രോഹിത്തും മാത്രമാണ് നിലവില്‍ അവസാന ഇലവനില്‍ ഉള്‍പ്പെടുമെന്ന് ഉറപ്പിക്കുന്ന താരങ്ങള്‍. ഐപിഎല്ലിലും അന്താരാഷ്‌ട്ര ടി20യിലും റെക്കോര്‍ഡ് റണ്‍നേട്ടമുണ്ടായിരിക്കെയാണ് താരത്തെ ഒഴിവാക്കുന്നതെന്നാണ് ആരോപണം.
മദ്ധ്യനിരയില്‍ പുതിയൊരു താരത്തെ പരീക്ഷിക്കാനാണ് അധികൃതര്‍ പദ്ധതിയിടുന്നത്. വിക്കറ്റ് കീപ്പര്‍ ബാറ്റര്‍ ഇഷാന്‍ കിഷനാണ് മാനേജ്‌മെന്റിന്റെ പദ്ധതികളിലുള്ളത്. തുടക്കം മുതല്‍ അക്രമിച്ചു കളിക്കുന്ന താരത്തെയാണ് മിഡില്‍ ഓര്‍ഡറില്‍ വേണ്ടതെന്നാണ് ടീമിന്റെ തീരുമാനം.
അതേസമയം കോലിയുടെ 2024 ഐ.പി.എല്‍ സീസണിലെ പ്രകടനം കൂടി വിലയിരുത്തിയാകും തീരുമാനം. എന്നാല്‍ നിലവില്‍ കോലി ആര്‍സിബിക്കായി ഓപ്പണറായാണ് ക്രീസില്‍ എത്തുന്നത്. തീരുമാനം എന്തായാലും കോലിയുമായി സംസാരിച്ചതിന് ശേഷമാകും ഉണ്ടാവുകയെന്നും ബിസിസിഐ ഔദ്യോഗിക വൃത്തങ്ങള്‍ വ്യക്തമാക്കുന്നു
