2023-ലെ ഏകദിന ലോകകപ്പിൽ ക്രിക്കറ്റ് ഇതിഹാസം സച്ചിൻ തെണ്ടുൽക്കറെ സാക്ഷിയാക്കിയാണ് വിരാട് കോലി ഏകദിന ക്രിക്കറ്റിലെ തന്റെ 50-ാം സെഞ്ച്വറി പൂർത്തിയാക്കിയത്. ന്യൂസിലൻഡിനെതിരായ സെമി ഫൈനൽ മത്സരത്തിനിടെയായിരുന്നു ഇത്. ഇതോടെ അന്താരാഷ്ട്ര കരിയറിൽ 80 സെഞ്ച്വറികൾ വിരാട് പൂർത്തിയാക്കിയിരുന്നു. സച്ചിൻ തെണ്ടുൽക്കറിന്റെ 100 സെഞ്ച്വറികൾ എന്ന റെക്കോർഡ് വിരാട് കോലി മറികടക്കുമോ എന്ന ചർച്ചകളും ആരാധകർക്കിടയിൽ തകൃതിയായി നടക്കുന്നുണ്ട്. എന്നാൽ വിരാട് കോലിയ്ക്ക് ഈ റെക്കോർഡ് മറികടക്കുക എന്നത് പ്രയാസകരമാണെന്ന് പറഞ്ഞിരിക്കുകയാണ് വെസ്റ്റ് ഇൻഡീസ് ഇതിഹാസം ബ്രായൻ ലാറ.
കോലിക്ക് ഇപ്പോൾ എത്ര വയസ്സായി? 35, അല്ലേ.. അദ്ദേഹത്തിന്റെ പേരിൽ 80 സെഞ്ച്വറികളുണ്ട്. ഇനിയും 20 എണ്ണം വേണം. എല്ലാ വർഷവും അഞ്ച് സെഞ്ച്വറി നേടിയാൽ സച്ചിന് ഒപ്പമെത്താൻ നാല് വർഷം കൂടി വേണ്ടി വരും. അപ്പോൾ കോലിക്ക് 39 വയസ്സായിരിക്കും പ്രായം. ഈ പ്രായത്തിൽ ഇത് വളരെ പ്രയാസകരമാണ്. പക്ഷേ മറികടക്കുമോയെന്ന് ആർക്കും പറയാൻ കഴിയില്ല. സച്ചിന്റെ 100 സെഞ്ച്വറിയെന്ന റെക്കോർഡ് കോലി തകർക്കുമെന്ന് പറയുന്നവർ ലോജിക് കണക്കിലെടുത്തിട്ടില്ല. – ലാറ പറഞ്ഞു.
താൻ കോലിയുടെ ആരാധകനാണ്. അദ്ദേഹം സച്ചിന്റെ ഓരോ റെക്കോർഡ് തകർക്കുന്നത് കാണുമ്പോഴും തനിക്ക് സന്തോഷമുണ്ട്. എന്റെ ആശംസകൾ അവനോടൊപ്പമുണ്ട്. സച്ചിനെപ്പോലെ അവന് 100 സെഞ്ച്വറികൾ നേടാനായാൽ ഞാൻ സന്തോഷവാനാണ്. അതേസമയം സച്ചിൻ എന്റെ പ്രിയപ്പെട്ട സുഹൃത്താണ.്-ലാറ വ്യക്തമാക്കി.
