അറ്റാർട്ടിക്കയിലെ മഞ്ഞുമല ഉരുകുന്നു, ആഗോള താപനം വർദ്ധിക്കുന്നു, കാലാവസ്ഥ വ്യതിയാനം സംഭവിക്കുന്നു, ജാഗ്രത പാലിക്കണം… ഇത്തരത്തിലുള്ള കാര്യങ്ങൾ കാലങ്ങളായി നാം കേൾക്കുന്നുണ്ടെങ്കിലും ഗൗരവമായി കാണുന്നില്ലെന്നതാണ് വാസ്തവം. എന്നാൽ അതിഗൗരവമായ പഠന റിപ്പോർട്ടാണ് അടുത്തായി പുറത്തുവന്നിട്ടുള്ളത്. അന്തരീക്ഷത്തിൽ കാർബൺ ഡൈ ഓക്സൈഡിന്റെ അളവ് വൻതോതിൽ വർദ്ധിക്കുന്നുവെന്നാണ് പുതിയ കണക്കുകൾ പറയുന്നത്.
കാർബൺ ഡൈ ഓക്സൈഡിന്റെ അളവ് ഗണ്യമായി വർദ്ധിക്കുന്നത് ഭൂമിയുടെ താപനില വർദ്ധിക്കാൻ കാരണമാകുന്നു. ആയിരക്കണക്കിന് വർഷമെടുത്താകും താപനിലയിൽ മാറ്റുണ്ടാവുക. ഏകദേശം അഞ്ച് മുതൽ എട്ട് വരെ ഡിഗ്രി സെൽഷ്യസാകും വർദ്ധിക്കുക. എന്നാൽ നിലവിലെ സാഹചര്യത്തിൽ കാർബൺ ഡൈ ഓക്സൈഡ് വർദ്ധിക്കുന്നതിന്റെ തോത് ഉയരുകയാണ്. ആയിരം വർഷം എന്നത് ഒരു പക്ഷേ നൂറ് വർഷമായേക്കാമെന്ന ഞെട്ടിക്കുന്ന പഠനമാണ് പുറത്തുവരുന്നത്. 16 രാജ്യങ്ങളിലായി 80 ഗവേഷകരുടെ എട്ട് വർഷത്തെ പരിശ്രമമാണ് പുതിയ പഠന റിപ്പോർട്ട്. പുതിയ ഡാറ്റ സൃഷ്ടിക്കാതെ നിലവിൽ ഉണ്ടായിരുന്ന പഠനങ്ങളെ അടിസ്ഥാനമാക്കിയും താരതമ്യപ്പെടുത്തിയുമായിരുന്നു സംഘത്തിന്റെ പഠനം.
നിലവിൽ 420 പാർട്സ് പെർ മില്യൺ കാർബൺ ഡൈ ഓക്സൈഡാണ് ഭൂമിയിലുള്ളത്. ഇന്ന് അന്തരീക്ഷത്തിൽ നിലനിൽക്കുന്ന കാർബൺ ഡൈ ഓക്സൈഡിന്റെ ഇത്രമാത്രം സാന്നിധ്യം ഭൂമിയിലുണ്ടായിട്ടുള്ളത് 14 ദശലക്ഷം വർഷങ്ങൾക്ക് മുൻപാണ്. ഐസ് പർവ്വതങ്ങളും ഹിമാനികളും ഇല്ലാതിരുന്ന, മനുഷ്യരുടെ പൂർവികർ പരിവർത്തനം ചെയ്യുന്ന കാലത്തായിരുന്നു ഭൂമിയിൽ നിലവിലത്തേതിന് സമാനമായ രീതിയുണ്ടായിരുന്നത്. ആധുനിക മനുഷ്യൻ പരിണമിച്ചിട്ട് മൂന്ന് ദശലക്ഷം വർഷങ്ങൾ മാത്രമായിട്ടുള്ളൂവെന്നതാണ് പ്രധാനം.
ഇതേ രീതിയിൽ കാർബൺ പുറന്തള്ളൽ തുടർന്നാൽ 2100- ഓടെ കാർബൺ ഡൈ ഓക്സൈഡ് സാന്ദ്രത 600 മുതൽ 800 ppm വരെ ആകാനുള്ള സാധ്യതയുണ്ട്. അറ്റാർട്ടിക്കയിൽ മഞ്ഞ് മൂടുന്നതിന് മുൻപ്, ലോകത്ത് വ്യത്യസ്ത ഇനം സസ്യജന്തുജാലങ്ങളെ കാണപ്പെടുന്നതിന് മുൻപ്, ഭീമൻ പ്രാണികളും ഭൂഷണി സൃഷ്ടിക്കുന്ന മൃഗങ്ങളും വിഹരിച്ചിരുന്നു. 40 ദശലക്ഷം വർഷങ്ങൾക്ക് മുൻപായിരുന്നു ഇത്. കാർബൺ ഡൈ ഓക്സൈഡ് നില വർദ്ധിച്ചാൽ ചൂടിനെ അതിജീവിക്കുന്ന ജീവജാലങ്ങൾ ഉടലെടുക്കും, മനുഷ്യന് ഭീഷണിയാകും.
കഴിഞ്ഞ 65 ദശലക്ഷം വർഷത്തിനിടെ ഏറ്റവും ചൂടേറിയ കാലഘട്ടം 50 ദശലക്ഷം വർഷങ്ങൾക്ക് മുൻപാണ് സംഭവിച്ചത്. ഈ കാലഘട്ടത്തിൽ ഭൂമിയിൽ സമാനമായ കാർബൺ ഡൈ ഓക്സൈഡിന്റെ അളവ് ദ്രുതഗതിയിൽ വർദ്ധിച്ചു. ആവാസവ്യവസ്ഥയിൽ തന്നെ വലിയ മാറ്റങ്ങൾക്ക് ഇത് വഴിവെച്ചു. പിന്നീട് 1.5 ദശലക്ഷം വർഷമെടുത്താണ് സാധാരണനിലയിലെത്തിയതെന്ന് ഗവേഷകർ അവകാശപ്പെടുന്നു.