പാലക്കാടൻ അഗ്രഹാരങ്ങളിലും തൈരും വേപ്പിലക്കട്ടിയും കൂട്ടിയുള്ള ഊണ് സാധാരണമാണ്. ഒരു കാലത്ത് മധ്യ തിരുവിതാംകൂറിലും പ്രചാരത്തിലുണ്ടായിരുന്നതും ഇന്ന് കേരളത്തിലെമ്പാടും പ്രചാരത്തിലുള്ളതുമായി ചമ്മന്തി ഇനമാണ് വേപ്പിലക്കട്ടി. പലയിടങ്ങളിലും പല രീതിയിലാണ് വേപ്പിലക്കട്ടി തയ്യാറാക്കുന്നത്. ചിലർ തേങ്ങ ചേർത്തും മറ്റു ചിലർ തേങ്ങ ചേർക്കാതെയുമൊക്കെ ഇത് തയ്യാറാക്കുന്നു. കാലങ്ങളോളം കേടുകൂടാതെ സൂക്ഷിക്കാനായി വേപ്പിലക്കട്ടി ഇങ്ങനെ തയ്യാറാക്കാം..
ചേരുവകൾ
- കറിവേപ്പില- മുപ്പത് തണ്ട് (വെയിലത്ത് വെച്ച് ഉണക്കിയെടുക്കാൻ പ്രത്യേകം ശ്രദ്ധിക്കണം) കടയിൽ നിന്ന് വാങ്ങുന്ന കറിവേപ്പില ആണെങ്കിൽ മഞ്ഞൾ വെള്ളത്തിൽ കഴുകിയെടുത്തതിന് ശേഷം ഉണക്കിയെടുക്കുക.
- ചെറുനാരകത്തിന്റെ ഇല- രണ്ടു കപ്പ് (ഇലയുടെ നടുഭാഗത്തുള്ള കട്ടികൂടിയ ഭാഗം എടുത്തു കളയേണ്ടതാണ്)
- വറ്റൽ മുളക്- 50 ഗ്രാം
- ഉഴുന്ന്- കാൽ കപ്പ്
- കായം
- മല്ലി-രണ്ട് ടേബിൾ സ്പൂൺ
- വറ്റൽ മുളക്- പത്തെണ്ണം
- വാളംപുളി-നാരങ്ങ വലുപ്പത്തിൽ
- ഉപ്പ്
തയ്യാറാക്കുന്ന വിധം
- കട്ടിയുള്ള പാത്രത്തിൽ നാരകത്തിന്റെ ഇലയും കറിവേപ്പിലയും വേവ്വെറെയായി വറുത്തെടുക്കുക.
- മറ്റൊരു ചട്ടിയിൽ ഉഴുന്ന് വറുത്തെടുക്കുക. ഇതിലേക്ക് കട്ട കായം ചേർത്ത് കൊടുക്കുക. കട്ട കായം ഇല്ലെങ്കിൽ അവസാനം കായപ്പൊടി ചേർത്ത് കൊടുക്കാവുന്നതാണ്. ഇതിലേക്ക് മല്ലി ചേർത്ത് കൊടുക്കുക. പിന്നാലെ വറ്റൽ മുളക് ചേർക്കുക. മൂത്ത് കഴിഞ്ഞ് തീ ഓഫാക്കുക.
- തണുത്ത് കഴിയുമ്പോൾ ഇത് പൊടിച്ചെടുക്കുക. പിന്നാലെ ഇലകളും പൊടിക്കുക. ഇതിലേക്ക് വാളംപുളിയും ഉപ്പും ചേർക്കുക.
- ശേഷം ഇത് ഉരുട്ടിയെടുക്കുക. ഇത് സൂക്ഷിച്ചുവെച്ചാൽ കാലങ്ങളോളം കേടുകൂടാതെ സൂക്ഷിക്കാവുന്നതാണ്.
