ചില വസ്തുക്കളോട് ഒരു പ്രത്യേക ഇഷ്ടം നമ്മിൽ പലർക്കും തോന്നിയിട്ടില്ലേ? ഒരു പക്ഷേ ചെറുപ്പത്തിലേ കൂടെ കൊണ്ടു നടക്കുന്ന വസ്തുക്കളായിരിക്കും അവ. കുട്ടിക്കാലത്ത് നമ്മൾ ഉപയോഗിച്ചിരുന്ന വസ്ത്രങ്ങൾ, പൊട്ടിയ മാലമുത്തുകൾ, കളിപ്പാട്ടങ്ങൾ എന്തിനേറെ പറയുന്നു ഭക്ഷണം കഴിക്കുന്നതിനും വെള്ളം കുടിക്കുന്നതിനു പോലും പ്രത്യേക പ്ലേറ്റും ഗ്ലാസും ആവശ്യമുള്ളവരും നമ്മുടെ കൂട്ടത്തിലുണ്ടെന്നതാണ് യാഥാർത്ഥ്യം. ഭക്ഷണവും വെള്ളവും ഇവർ ഉപയോഗിക്കുന്ന പ്ലേറ്റിലോ ഗ്ലാസിലോ കിട്ടിയില്ലെങ്കിൽ പിന്നെ ഭക്ഷണം കഴിക്കാനും ഇങ്ങനെയുള്ളവർക്ക് മടിയായിരിക്കും. എന്നാൽ എന്നും ഒരേ ഗ്ലാസിൽ തന്നെ വെള്ളം കുടിക്കുന്നവരാണ് നിങ്ങൾ എങ്കിൽ സൂക്ഷിച്ചോളൂ..
വെള്ളം കുടിക്കുമ്പോൾ തുടർച്ചയായി ഒരേ ഗ്ലാസിലോ ബോട്ടിലിലോ കുടിക്കുന്ന ചിലരെങ്കിലുമുണ്ട്. പലപ്പോഴും വെള്ളം കുടിച്ചു കഴിഞ്ഞാൽ ഇത് കഴുകി വെക്കാറുമില്ല. പിന്നെയും ആ ഗ്ലാസ് തന്നെ ഉപയോഗിക്കും. ഇങ്ങനെ തുടർച്ചയായി കഴുകാത്ത ഗ്ലാസിൽ വെള്ളം കുടിച്ചാൽ രോഗകാരികളായ ബാക്ടീരിയകൾ വർദ്ധിക്കാൻ കാരണമാകുന്നു. ഗ്ലാസിന്റെ ഉപരിതലത്തിൽ ബാക്ടീരിയകൾ പെരുകാനുള്ള സാധ്യത വളരെ കൂടുതലാണ്.
തുടർച്ചയായി ഈ ഗ്ലാസിലോ, കുപ്പിയിലോ വെള്ളം കുടിക്കുമ്പോൾ ബാക്ടീരിയകൾ ശരീരത്തിലും എത്തുന്നു. ഇത് പല രോഗങ്ങൾക്കും വഴിവച്ചേക്കാം. ചിലർ വെള്ളം കുടിക്കുന്നതിനു മുമ്പ് വെറുതെയൊന്ന് വെള്ളം ഒഴിച്ച് ഗ്ലാസ് കഴുകാറുണ്ട്. എന്നാൽ ഇങ്ങനെ ചെയ്യുന്നത് കൊണ്ടും പ്രയോജനമില്ല. ബാക്ടീരിയകളുടെ സാന്നിധ്യം ഗ്ലാസിൽ തന്നെയുണ്ടാകുമെന്നാണ് ആരോഗ്യ വിദഗ്ധർ പറയുന്നത്. സോപ്പും വെള്ളവുമുപയോഗിച്ച് വൃത്തിയായി കഴുകിയില്ലെങ്കിൽ ബാക്ടീരിയകൾ വർദ്ധിക്കാനുള്ള സാധ്യത ഏറെയാണ്.
