ആദായനികുതി വകുപ്പിന്റെ പോർട്ടലിൽ ഡിസ്‌കാർഡ് റിട്ടേൺ ഓപ്ഷൻ കൂടി സജ്ജമാക്കി സർക്കാർ. നികുതി ദായകർക്ക് അവരുടെ ആദായനികുതി റിട്ടേണിലെ തെറ്റുകൾ തിരുത്തുന്നതിനും പുതിയ റിട്ടേൺ ഫയൽ ചെയ്യുന്നതിനും വേണ്ടിയാണ് ഓപ്ഷൻ അവതരിപ്പിച്ചിരിക്കുന്നത്. ഇൻകം ടാക്‌സ് ഇ-ഫയലിംഗ് പോർട്ടൽ മുഖേന നികുതി ദായകർക്ക് അപ്ലോഡ് ചെയ്തിട്ടുള്ള ഐടിആറുകൾ പരിശോധിച്ച് ഉറപ്പിക്കുന്നതിന് മുമ്പ് തെറ്റ് തിരുത്താനാകും. കൂടാതെ പുതുക്കിയ ഐടിആർ ഫയൽ ചെയ്യാനും ഇതിലൂടെ സാധിക്കും.
ആദായനികുതി റിട്ടേണുകൾ ഫയൽ ചെയ്യുന്ന പ്രക്രിയ കാര്യക്ഷമമാക്കുന്നതിന്റെ ഭാഗമാണിത്. മുമ്പ് നികുതി ദായകർ ആദ്യം സമർപ്പിച്ച റിട്ടേണുകളിൽ തെറ്റുണ്ടെങ്കിൽ പുതുക്കിയ ഐടിആറുകൾ വീണ്ടും ഫയൽ ചെയ്യുന്നതായിരുന്നു രീതി. എന്നാൽ ഇനി ഇത്തരത്തിൽ എന്തെങ്കിലും തരത്തിലുള്ള പിഴവുകളോ വീഴ്ചകളോ സംഭവിക്കുകയാണെങ്കിൽ ഈ ഓപ്ഷൻ പ്രയോജനപ്പെടുത്താവുന്നതാണ്. എന്നാൽ ഉപയോക്താക്കൾ ഐടിആർ സംബന്ധിച്ച് ഒരിക്കൽ ഡിസ്‌കാർഡ് റിട്ടേൺ ക്ലിക്ക് ചെയ്യുകയാണെങ്കിൽ ഇത് പഴയ രീതിയിലാക്കാൻ സാധിക്കില്ല.
ഡിസ്‌കാർഡ് ഓപ്ഷൻ ഉപയോഗിക്കുന്ന രീതി ഇങ്ങനെ…
- www.incometax.gov.in സന്ദർശിക്കുക
- പോർട്ടലിൽ ലോഗിൻ ചെയ്യുക
- ഇ-ഫയലിലേക്ക് പോകുക
- ആദായ നികുതി റിട്ടേണിലേക്ക് പോകുക
- e-Verify ITR എന്നതിൽ ക്ലിക്ക് ചെയ്യുക
- ‘ഡിസ്‌കാർഡ് ‘ ഓപ്ഷനിൽ ക്ലിക്ക് ചെയ്യുക
