ഉപയോക്താക്കൾക്ക് മുന്നിൽ രസകരമായ ഡൂഡിൽ ഗെയിം അവതരിപ്പിച്ച് ഗൂഗിൾ. മോസ്റ്റ് സെർച്ചഡ് പ്ലേഗ്രൗണ്ട് എന്ന പേരിലാണ് ഗൂഗിൾ ഡൂഡിൽ ഗെയിം അവതരിപ്പിച്ചിരിക്കുന്നത്. 25-ാം വാർഷികത്തോടനുബന്ധിച്ചാണ് ഇന്ന് ഡൂഡിൽ ഗെയിം അവതരിപ്പിച്ചത്. കഴിഞ്ഞ 25 വർഷത്തിനിടെ ഏറ്റവും കൂടുതൽ ആളുകൾ തിരഞ്ഞ വ്യക്തികൾ, സ്ഥലങ്ങൾ, സന്ദർഭങ്ങൾ എന്നിവയെല്ലാം ഉൾപ്പെടുത്തിയാണ് ഗെയിം അവതരിപ്പിച്ചിരിക്കുന്നത്.
ഗെയിം കളിക്കേണ്ട രീതി എങ്ങനെയെന്ന് നോക്കാം…
സംഗീതം, കല, കായികം, ശാസ്ത്രം, സാംസ്കാരികം, യാത്ര എന്നിങ്ങനെ അഞ്ച് വിഭാഗങ്ങളിലായി ഉപയോക്താക്കൾക്ക് മുന്നിൽ സൂചനകൾ നൽകിയിട്ടുണ്ടാകും. ഇതിനൊപ്പം തന്നെ ഡൂഡിൽ മാപ്പും നൽകിയിട്ടുണ്ടാകും. മാപ്പിലെ ഏതെങ്കിലും ഒരു ചിത്രമാണ് സൂചനയ്ക്കൊപ്പം ഉണ്ടാകുക. ഇത് മാപ്പിൽ നിന്ന് കണ്ടെത്തി വേണം മുന്നോട്ട് നീങ്ങാൻ.
ഇത്തരത്തിൽ കഴിഞ്ഞ 25 വർഷത്തിനിടെ ഗൂഗിളിൽ ഏറ്റവും കൂടുതൽ തവണ തിരഞ്ഞ 20 കാര്യങ്ങൾ ഡൂഡിൽ ഗെയിമിലൂടെ അവതരിപ്പിക്കുന്നു. ഏറ്റവും അധികം തിരഞ്ഞ ബോയ് ബാൻഡ് ആയി ബിടിഎസ് മാറി. ഏറ്റവും കൂടുതൽ തവണ തിരഞ്ഞ കളിപ്പാട്ടം ബാർബിയാണ്. ശാസ്ത്രജ്ഞൻ ആൽബർട്ട് ഐൻസ്റ്റിനാണ്. ഏറ്റവും അധികം ആളുകൾ തിരഞ്ഞ ഗാനരചയിതാവ് ടെയ്ലർ സ്വിഫ്റ്റ് ആണ്.
ആനിമേറ്റ് ചെയ്ത ഡൂഡിൽ മുഖേനയോ ഗൂഗിളിന്റെ പ്ലാറ്റ്ഫോമിലൂടെയോ ഗെയിമിലേക്ക് ആക്സസ് ലഭിക്കും. 1998-മുതൽ ഉപയോക്താക്കൾ ഓൺലൈൻ മുഖേന തിരഞ്ഞ കാര്യങ്ങളാണ് ഗെയിമിലുള്ളത്. കഴിഞ്ഞ 25 വർഷത്തെ നാൾവഴികൾ തുറന്ന് കാട്ടുക എന്നതാണ് ഗൂഗിൾ ഇതിലൂടെ ലക്ഷ്യം വയ്ക്കുന്നത്. ഈ കാലയളവിൽ ആഗോള ശ്രദ്ധ പിടിച്ചു പറ്റിയ ട്രെൻഡുകൾ, വിഷയങ്ങൾ, വ്യക്തികൾ എന്നിവ വീണ്ടും ഓർമ്മിപ്പിക്കുകയാണ് ഇതിലൂടെ.