തിരുവനന്തപുരം: ആർട്സ് ആൻഡ് സയൻസ് കോളേജിലെ കായികാദ്ധ്യാപകരെ പ്രിൻസിപ്പൽ സ്ഥാനത്തേക്ക് നിയമിക്കാൻ അനുമതി നൽകി ഉന്നത വിദ്യാഭ്യാസ വകുപ്പിന്റെ ഉത്തരവ്. യുജിസി അംഗീകൃത സംസ്ഥാന തല യോഗ്യതാ പരീക്ഷ വിജയിച്ച കോളേജുകളിൽ ഇവരെ അസി. പ്രൊഫസർമാരായും നിയമിക്കുന്നതിന് അനുമതി നൽകി.
കോളേജ് വിദ്യാഭ്യാസ വകുപ്പിന്റെ പ്രത്യേകചട്ടപ്രകാരം നിലവിൽ കായികാദ്ധ്യാപകരെ പ്രിൻസിപ്പൽ തസ്തികയിലേക്ക് നിയമിക്കുന്നതിന് വ്യവസ്ഥയില്ല. എന്നാൽ യുജിസിയുടെ മാർഗനിർദ്ദേശങ്ങൾ അനുസരിച്ച് ഇത് അംഗീകരിക്കുന്നുണ്ടുതാനും. ഇതിന്റെ പശ്ചാത്തലത്തിലാണ് കായികാദ്ധ്യാപകരെയും പ്രിൻസിപ്പൽ തസ്തികയിലേക്ക് നിയമിക്കുന്നതിനുള്ള നിർദ്ദേശം കൈമാറിയത്.
അസി. പ്രൊഫസർ തസ്തികയിലേക്ക് നേരിട്ടു നിയമിക്കുന്നതിന് നെറ്റ് ആവശ്യമാണ്. ഇതിന് പുറമെ സംസ്ഥാനതല യോഗ്യതാ പരീക്ഷകൾ പാസായ ഉദ്യോഗാർത്ഥികളെയും പരിഗണിക്കണമെന്ന് യുജിസി പുറത്തുവിട്ട ഭേദഗതിയിൽ പറയുന്നു. ഇത് പ്രാബല്യത്തിൽ വരുന്നതോടെ മറ്റ് സംസ്ഥാനങ്ങളിൽ പരീക്ഷ വിജയിക്കുന്നവർക്കും കേരളത്തിൽ കോളേജ് അദ്ധ്യാപകരാകാൻ സാധിക്കും.