തിരുവനന്തപുരം: സംസ്ഥാനത്ത് പകർച്ചപ്പനിക്കൊപ്പം കൊറോണ ബാധിതരുടെ എണ്ണവും വർദ്ധിക്കുന്നു. കേന്ദ്ര ആരോഗ്യമന്ത്രാലയത്തിന്റെ കണക്കുകൾ പ്രകാരം സംസ്ഥാനത്ത് നിലവിൽ ചികിത്സയിലുള്ള കൊറോണ ബാധിതരുടെ എണ്ണം 949 ആണ്. ഒരു മാസത്തിനിടെയാണ് കണക്കിൽ സംസ്ഥാനത്ത് വർദ്ധനവുണ്ടായിരിക്കുന്നത്. കേന്ദ്ര ആരോഗ്യ മന്ത്രാലയത്തിന്റെ കണക്കുകൾ പ്രകാരം രാജ്യത്തെ ആകെ കൊറോണ ബാധിതരുടെ എണ്ണം 1091 ആണ്.
സംസ്ഥാനത്ത് പ്രതിദിന രോഗബാധിതരുടെ എണ്ണം 100-നും 150-നും ഇടയിലാണ്. സംസ്ഥാനതലത്തിലെ കൊറോണ ബാധിതരുടെ പ്രതിദിന വിവരങ്ങൾ കേന്ദ്രത്തിന് കൈമാറുന്നുണ്ടെങ്കിലും ഇത് സംസ്ഥാനത്ത് ഔദ്യോഗികമായി പ്രസിദ്ധീകരിക്കാൻ ആരോഗ്യവകുപ്പ് തയ്യാറല്ല. ഇക്കാരണങ്ങളാൽ സംസ്ഥാനത്ത് ജനങ്ങൾക്കിടയിൽ കൊറോണ ജാഗ്രത കുറവാണ്. ഇത് രോഗികളുടെ എണ്ണം കൂട്ടാൻ കാരണമാകുന്നു. നിലവിൽ ഗുരുതരമായ കെറോണ ലക്ഷണങ്ങളുമായെത്തുന്നവരെ പ്രവേശിപ്പിക്കാൻ സംസ്ഥാനത്തെ പല ആശുപത്രികളും മടി കാണിക്കുന്നുമുണ്ട്.
അതേസമയം സംസ്ഥാനത്ത് പകർച്ചപ്പനിയും പടരുകയാണ്. 12,000-ത്തിലധികം പേരാണ് പ്രതിദിനം സംസ്ഥാനത്തെ ആശുപത്രികളിൽ ചികിത്സ തേടുന്നത്. 5412 പേരാണ് ഈ മാസം സംസ്ഥാനത്ത് ചികിത്സ തേടിയത്. 172 പേർ എലിപ്പനിക്കും ചികിത്സതേടി. 54 പേർക്ക് എച്ച്1 എൻ1-ഉം 52 പേർക്ക് ചെള്ളുപനിയും ബാധിച്ചതായാണ് കണക്കുകൾ.
