എഐ സാങ്കേതികവിദ്യയിലൂടെ ചിത്രങ്ങൾ നിർമ്മിക്കുന്ന പുതിയ വേർഷൻ അവതരിപ്പിച്ച് ഗൂഗിൾ. ഇമേജൻ-2 എന്ന പുതിയ പതിപ്പാണ് ഗൂഗിൾ അവതരിപ്പിച്ചിരിക്കുന്നത്. വാക്കുകൾ ടൈപ്പ് ചെയ്ത് നൽകുമ്പോൾ ഇവ ചിത്രങ്ങളാക്കി മാറ്റുന്ന പുതിയ ടൂളാണിത്. ഇത് ഗൂഗിളിന്റെ വെർട്ടെക്‌സ് എഐ ഉപയോക്താക്കൾക്കാകും ലഭ്യമാകുക.
ടൈപ്പ് ചെയ്ത് നൽകുന്ന നിർദ്ദേശങ്ങളിൽ നിന്ന് മികച്ച ചിത്രങ്ങൾ നിർമ്മിച്ചെടുക്കാൻ ഇമേജൻ-2വിലൂടെ സാധിക്കും. ഗൂഗിൾ ഡീപ്പ് മൈൻഡ് വികസിപ്പിച്ചിട്ടുള്ള സാങ്കേതിക വിദ്യയാണ് ഇതിൽ ഉപയോഗിച്ചിരിക്കുന്നത്. മുമ്പുള്ള വേർഷനേക്കാൾ മികച്ച ചിത്രങ്ങൾ നൽകാൻ ഇത് സഹായിക്കുന്നു.
ഇമേജൻ-2 സാങ്കേതിക വിദ്യയിലൂടെ ഇക്കാര്യങ്ങൾ ചെയ്യാവുന്നതാണ്…
- ഉപയോക്താക്കൾ ടൈപ്പ് ചെയ്ത് നൽകുന്ന വാക്കുകളിൽ നിന്ന് മനോഹരമായ ചിത്രങ്ങൾ ലഭിക്കും.
- ചിത്രങ്ങൾ നിർമ്മിക്കുന്നതിനായി വിവിധ ഭാഷകളിൽ വാക്കുകൾ കൃത്യമായി നൽകാനാകും,
- കമ്പനികൾക്കും ഉത്പന്നങ്ങൾക്കും വേണ്ടി ലോഗോ നിർമ്മിച്ച് ഇവ ചിത്രത്തിൽ ചേർക്കാനാകും.
- ചിത്രത്തിൽ എന്താണെന്നുള്ളത് സംബന്ധിച്ച് കൃത്യമായ ഉത്തരം നൽകുകയും അടിക്കുറിപ്പുകൾ ചേർക്കുകയും ചെയ്യുക.
- ചൈനീസ്, ഹിന്ദി, ജാപ്പനീസ്, കൊറിയൻ, പോർച്ചുഗീസ്, ഇംഗ്ലീഷ്, സ്പാനിഷ് എന്നീ ഭാഷകളിൽ ടൈപ്പ് ചെയ്ത് ചിത്രങ്ങൾ നിർമ്മിക്കാനാകും.
പുതിയ അപ്‌ഡേറ്റിൽ സ്വകാര്യതയും സുരക്ഷിതത്വവും കൂടുതൽ ഉറപ്പു വരുത്തുന്നു. സ്വകാര്യതയും സുരക്ഷയും ഇതിലൂടെ ലഭ്യമാകുന്നുവെന്ന് പരിശോധിക്കുന്നതിനായി വേണ്ട സജ്ജീകരണങ്ങളും ഇതിലുണ്ട്. കൂടാതെ ഉപയോക്താക്കൾ നിർമ്മിക്കുന്ന ചിത്രങ്ങളുമായി ബന്ധപ്പെട്ട് നിയമ പ്രശ്‌നങ്ങൾ നേരിട്ടാൽ ഗൂഗിളിൽ നിന്ന് പിന്തുണ ലഭിക്കും. ചിത്രങ്ങളുടെ പകർപ്പവകാശം, ഉടമസ്ഥാവകാശം എന്നിവ സംബന്ധിച്ചുണ്ടാകുന്ന പ്രശ്‌നങ്ങളിലും ഗൂഗിൾ ഉപയോക്താക്കൾക്ക് പിന്തുണ നൽകും.
