പണ്ടുകാലം മുതൽ വിവിധ ആവശ്യങ്ങൾക്കായി തേൻ ഉപയോഗിക്കുന്നു. ആരോഗ്യത്തിനും ചർമ സംരക്ഷണത്തിനും ഒരേ പോലെ ഉപയോഗിക്കാവുന്നതാണ് തേൻ. പ്രകൃതിയിൽ നിന്ന് ലഭിക്കുന്നവയിൽ ഔഷധ ഗുണങ്ങൾ ഏറെയുള്ളതാണ് തേൻ. തേനിന്റെ മധുരം എല്ലാവരെയും ആകർഷിക്കുന്ന ഒന്നാണ്.
പൊതുവേ അമിതമായി മധുരം കഴിക്കുന്നത് ആരോഗ്യത്തിന് അത്ര നല്ലതല്ലെന്നുള്ള കാര്യം എല്ലാവർക്കും അറിയാം. മധുരം അമിതമാക്കുന്നത് വണ്ണം കൂടാനും പ്രമേഹ സാധ്യതയും വർദ്ധിക്കുന്നു. എന്നാൽ തേൻ ഉപയോഗിക്കുന്നത് പഞ്ചസാരയോളം പ്രശ്നങ്ങൾ സൃഷ്ടിക്കുന്നില്ല. അതുപോലെ തന്നെ ചർമ്മസംരക്ഷണത്തിൽ ഏറെ പ്രാധാന്യമുള്ള ഒന്നാണ് തേൻ. ചർമ്മം തിളങ്ങാൻ തേൻ ഇങ്ങനെ ഉപയോഗിക്കാം..
1) ചർമ്മത്തിലെ ചുളിവുകളെ ഒഴിവാക്കാൻ മികച്ച ഓപ്ഷനാണ് തേൻ. ആഴ്ചയിൽ രണ്ടോ മൂന്നോ തവണ മുഖത്തും കഴുത്തിലും പുരട്ടുന്നത് മുഖത്തെ ചുളിവുകൾ മാറാൻ നല്ലതാണ്. മൃതകോശങ്ങളെ ഇല്ലാതാക്കാൻ തേൻ സഹായിക്കുന്നു.
2) മുഖം വ‍ൃത്തിയാകുന്നതിനും നിറം വർദ്ധിക്കുന്നതിനും തേൻ സഹായിക്കും. തേനും മഞ്ഞളും ചേർത്ത് മുഖത്ത് പുരട്ടി 15 മിനിറ്റിന് ശേഷം കഴുകി കളയുക.
3) മുഖത്തിന് തിളക്കത്തിനൊപ്പം മൃദുത്വവും ആഗ്രഹിക്കുന്നവർ രണ്ട് സ്പൂൺ തേൻ തുല്യ അളവിൽ ഓറഞ്ച് ജ്യൂസുമായി ചേർത്ത് മുഖത്ത് പുരട്ടുക. ഉണങ്ങിയ ശേഷം കഴുകി കളയുക.
4) മുഖക്കുരു മൂലമുണ്ടാകുന്ന പാടുകൾ മാറാൻ തേനും കറുവപ്പട്ട പൊടിയും ചേർത്തിളക്കിയ കുഴമ്പ് മുഖക്കുരുവിന് മുകളിൽ പുരട്ടാം. രാത്രിയിൽ പുരട്ടിയതിന് ശേഷം രാവിലെ ചെറു ചൂട് വെള്ളത്തിൽ കഴുകി കളയുക.
5) ചുണ്ടുകൾ മൃദുവാകാനായി പതിവായി തേൻ ചുണ്ടുകളിൽ പുരട്ടിയാൽ മതി.
6) ബ്ലാക്ക് ഹെഡ്സുകൾ ഇല്ലാതാക്കാനായി രണ്ട് ടേബിൾ സ്പൂൺ വെളിച്ചെണ്ണയും ഒരു ടേബിൾ സ്പൂൺ തേനും ചേർത്ത് പുരട്ടി മസാജ് ചെയ്യുക
7) മൃതകോശങ്ങളോട് വിട പറയാൻ തീർച്ചയായും തേൻ ഉപയോഗിക്കണം. തേൻ മുഖത്ത് പുരട്ടി വൃത്താരകൃതിയിൽ പുരട്ടുക. 15 മിനിറ്റ് കഴിഞ്ഞ് കഴുകി കളയുക.
8) കണ്ണിന് താഴെയുള്ള കറുപ്പ് മാറ്റാനും തേൻ സഹായിക്കും. തേനിനൊപ്പം അൽപ്പം തൈര് ചേർത്ത് പുരട്ടുക.
9) ചുവന്ന് തുടുത്ത കവിളുകളാണ് സ്വപ്നമെങ്കിൽ ദിവസവും രണ്ട് നേരം ഒരു സ്പൂൺ തേനും തുളസി നീരും ചേർത്ത് കഴിക്കുന്നത് നല്ലതായിരിക്കും.
10) കുളിക്കുന്ന വെള്ളത്തിലും തേൻ ചേർക്കുന്നത് നല്ലതാണ്. ചർമ്മ പ്രശ്നങ്ങൾക്ക് പരിഹാരം നൽകാൻ ഇതിന് കഴിയും.
