ഇടുക്കി: വിനോദ സഞ്ചാരികൾക്ക് എക്കാലവും പ്രിയമേറിയ ജില്ലയാണ് ഇടുക്കി. മലനിരകളും തേയില തോട്ടങ്ങളും വെള്ളച്ചാട്ടങ്ങളുമെല്ലാം ജില്ലയിലേക്ക് വിനോദസഞ്ചാരികളെ കൂടുതൽ ആകർഷിക്കുന്നു. കട്ടപ്പന-കുട്ടിക്കാനം റോഡിലൂടെ സഞ്ചരിക്കുന്ന വിനോദ സഞ്ചാരികൾക്ക് ഇത്തരത്തിൽ കാഴ്ചയുടെ വിസ്മയ ലോകമാണ് ഇവിടെയുള്ളത്. ഈ റൂട്ടിലൂടെയുള്ള യാത്രയിൽ സഞ്ചാരികളുടെ പ്രധാന ഇടത്താവളമാണ് വാകമരം വ്യൂപോയിന്റ്. വാഗമണ്ണിലേക്കുള്ള റോഡും പച്ചപ്പ് നിറഞ്ഞ തേയിലതോട്ടങ്ങളും ഏലപ്പാറയിൽ നിന്നുള്ള തോടും മലകൾക്കപ്പുറത്തേക്ക് നീണ്ടുകിടക്കുന്ന ഏലപ്പാറയുടെ വിദൂരദൃശ്യവും ഇവിടെ നിന്നും കാണാം.
മലയോര മേഖലകളിലെ ഹൈവേയുടെ നിർമ്മാണം പൂർത്തിയായത് വ്യൂപോയിന്റിൽ നിന്നുള്ള കാഴ്ചകൾക്ക് മാറ്റുകൂട്ടി. ഇതിന് പുറമെ ഹൈവേയുടെ ഭാഗമായി നടപ്പാത പണി കഴിപ്പിച്ചിരിക്കുന്നതും കാഴ്ചകൾ കണ്ട് നടക്കാൻ ഏറെ സൗകര്യപ്രദമാണ്. പടർന്ന് പന്തലിച്ച് നിൽക്കുന്ന വാകമരമാണ് പ്രദേശത്തിന്റെ ഏറ്റവും വലിയ പ്രത്യേകത. ഇളം വെയിൽ ചില്ലകളിൽ തട്ടി നിലത്തേക്ക് പതിക്കുന്നതുൾപ്പെടെ മനോഹരമായ കാഴ്ചകളാണ് ഇവിടെയുള്ളത്.
മണ്ഡലകാലം ആരംഭിച്ചതോടെ അയ്യപ്പഭക്തരും ഇവിടെ ചിലവഴിക്കാറുണ്ട്. പൊതുവെ വൈകുന്നേരങ്ങളിലാണ് സഞ്ചാരികളുടെ തിരക്കേറുന്നത്. വാഗമൺ, പരുന്തുംപാറ, കുട്ടിക്കാനം, പാഞ്ചാലിമേട്, അമ്മച്ചിക്കൊട്ടാരം, വെള്ളച്ചാട്ടങ്ങൾ, തേയില തോട്ടങ്ങൾ, ഇലവീഴാപൂഞ്ചിറ, ഡാമുകൾ, കുരിശുപാറ, പീരുമേട്, രാമക്കൽമേട്, മൂന്നാർ, ആനമുടി, മീശപുലിമല എന്നിങ്ങനെ നീളുന്നു ജില്ലയിലെ വിസ്മയങ്ങൾ.