മഞ്ഞുകാലമെത്തിയാൽ പലരും നേരിടുന്ന പ്രശ്‌നങ്ങളിലൊന്നാണ് മുടിക്കൊഴിച്ചിൽ. മുടികളുടെ അറ്റം പെട്ടന്ന് പിളരുക, കൊഴിഞ്ഞു പോവുക എന്നീങ്ങനെ പല പ്രശ്‌നങ്ങളും പലരും നേരിടുന്നുണ്ടാവും. മുടിക്ക് ആവശ്യമായ പരിചരണം ലഭിക്കാത്തതാണ് മുടികൊഴിച്ചിലിന്റെ പ്രധാന കാരണങ്ങളിലൊന്ന്. മുടികൊഴിച്ചിൽ ചെറുത്തു നിർത്താൻ ഇക്കാര്യങ്ങൾ ശദ്ധിക്കാം..
തലയോടിൽ ഈർപ്പം നിലനിർത്താൻ ശ്രദ്ധിക്കുക
ശിരോചർമ്മത്തിൽ ഈർപ്പം നിലനിർത്തുന്നത് മുടികൊഴിച്ചിൽ നിയന്ത്രിച്ച് നിർത്താൻ സഹായിക്കുന്നു. ഇത് മുടി പെട്ടന്ന് വരണ്ടുണങ്ങി പൊട്ടുന്നത് കുറയ്‌ക്കാൻ സഹായിക്കും. ശൈത്യകാലത്ത് കെമിക്കലുകൾ അടങ്ങിയ ഷാംപൂ, കണ്ടീഷണർ തുടങ്ങിയവ ഒഴിവാക്കി പ്രകൃതിദത്തമായ ചെമ്പരത്തി താളി, പയറുപൊടി എന്നിവ തലയിൽ തേച്ചു പിടിപ്പിച്ച് കഴുകി കളയാം. ഇത് തലയോടിൽ ഈർപ്പം നിലനിർത്താൻ സഹായിക്കുന്നു.
തണുത്ത വെള്ളം കൊണ്ട് തല കഴുകുക
ശൈത്യകാലത്ത് ചൂടുവെള്ളത്തിൽ കുളിക്കുന്നതാണ് മുടിക്കും ശരീരത്തിനും നല്ലതെന്നാണ് പലരും വിചാരിക്കുന്നത്. എന്നാൽ ഇത് തെറ്റായ ഒരു ധാരണയാണ്. തണുത്ത വെള്ളത്തിൽ കുളിക്കുന്നതാണ് ആരോഗ്യത്തിനും മുടിക്കും നല്ലതെന്ന് പഠനങ്ങൾ പറയുന്നു. ചൂടുവെള്ളം കൊണ്ട് മുടി കഴുകുന്നത് മുടികൊഴിച്ചിലിന്റെ ആക്കം കൂട്ടുന്നു.
പൊടിപടലങ്ങളിൽ നിന്നും തലമുടി സംരക്ഷിക്കുക
പുറത്തിറങ്ങുമ്പോൾ നമ്മൾ നേരിടുന്ന പ്രധാന പ്രശ്‌നങ്ങളിലൊന്നാണ് പൊടിപടലങ്ങൾ. ഇത് മുടി പെട്ടന്ന് പൊട്ടി പോകാനും കൊഴിയാനും ഇടയാക്കുന്നു. അതിനാൽ പുറത്തിറങ്ങുമ്പോൾ തലമുടി കെട്ടിവയ്‌ക്കുകയോ തൊപ്പികൊണ്ട് മറയ്‌ക്കുകയോ ചെയ്യാം.
തല മസാജ് ചെയ്യുക
മുടി വളരുന്നതിന് മസാജ് ചെയ്യുന്നത് വളരെ ഉത്തമമാണ്. ചെറു ചൂടുള്ള വെളിച്ചെണ്ണയോ അല്ലെങ്കിൽ നിങ്ങൾ സ്ഥിരമായി ഉപയോഗിക്കുന്ന ഹെയർ ഓയിലോ ഉപയോഗിച്ച് തല ഇടയ്‌ക്കിടെ മസാജ് ചെയ്യുന്നത് മുടി വളരാൻ സഹായിക്കുന്നു.
ഹെയർ ഡ്രയർ പോലുള്ളവ ഒഴിവാക്കുക
കുളി കഴിഞ്ഞാൽ മുടി വേഗം ഉണങ്ങുന്നതിനായി ഹെയർ ഡ്രയർ ഉപയോഗിക്കുന്നവരാണ് നമ്മിൽ പലരും. എന്നാൽ ഇത് സ്ഥിരമായി ഉപയോഗിക്കുന്നത് മുടിക്ക് ദോഷം ചെയ്യുന്നു. മുടി പെട്ടന്ന് പൊട്ടി പോകാനും ഈർപ്പം നഷ്ടപ്പെടാനും ഇത് കാരണമാകുന്നു.
